கற்கரைப்பிள்ளையார் கோவிலடி

நியூசிலாந்து 45 -உலகப் புகழ் பெற்ற பிளவுபட்ட அப்பிள் பாறை (Split Apple Rock)

2012-02-07T22:07:00.000-08:00

பிக்டனில் இருந்து வெளிக்கிட்டு ரிவாக்காவினை அடையும் போது மாலை 6.30 ,7 மணியாகிவிட்டது. ஆனால் விடுதி இருக்கும் வீதியைத் தேடிக் களைத்துப் போனோம். வீதியில் செல்பவர்களைக் கேட்டுப் பார்த்து, அருகில் இருந்த எரிபொருள் நிலையத்தில் வேலை செய்பவரின் உதவியுடன் ஒருவாறு விடுதியினைக் கண்டுபிடித்தோம். நல்லகாலம் இருளவில்லை. இருண்டிருந்தால் இன்னும் தேடிக்கொண்டிருந்திருப்போம். பொதுவாக நியூசிலாந்தின் தெற்கு நிலப்பரப்பில் பிரதான முக்கிய நகரங்களைத் தவிர மற்றைய இடங்களுக்கு இரவில் பயணிப்பது மிகவும் கடினமானது. நாங்கள் இருந்த விடுதி(Chalets @ Terraced Gardens) சுற்றவர தோட்டங்களுக்கு நடுவில் இருந்தது. செம்மறி ஆடுகள் விடுதியின் பின்னால் நின்றன. றிவாக்காவில் இரவில் பார்ப்பதற்கு ஒன்றுமில்லை. மறு நாள் காலை எழுந்ததும் அபில் தஸ்மான் தேசிய பூங்காவில் உள்ள கைத்தேரிதேரி(Kaiteriteri) என்ற இடத்துக்கு சென்றோம். விடுதியில் இருந்து 7, 8 நிமிடங்கள் பயணித்தால் கைத்தேரிதேரியினை அடையலாம். இங்கு தான் நான் முதல் நாள் முன்பதிவு செய்த அபில் தஸமான் தேசிய பூங்காவில் படகுப் பயணம் ஆரம்பிக்கும் இடமாகும். அங்குள்ள தகவல் நிலையத்தில் முன்பதிவு செய்த விபரத்தினைக் காட்டினேன். படகு வெளிக்கிட அரை மணித்தியாலம் இருப்பதினால் அருகில் இருந்த கடை ஒன்றில் சில விசுக்கோத்துக்கள், சிப்ஸ் போன்ற உணவுகளை வாங்கி உண்டேன்.

அபில் தஸமான் தேசிய பூங்காவில் பல சுற்றுலாப் பயணிகள் 2, 3 நாட்கள் தங்கித் தங்கி நடந்து செல்வார்கள். சிலர் படகுகளில் சென்று சில இடங்களில் நடந்து செல்வார்கள். நாங்கள் சென்ற பயணம் கிட்டத்தட்ட 3 மணித்தியாலப் படகுப் பயணம்.Torrent Bay, Bark Bay, Awaroa and Totaranui போன்ற இடங்களினூடகப் படகு சென்று வரும். நாங்கள் பயணித்த படகின் பெயர் Abel Tasman Sea Shuttles. காலை 9.15க்குப் படகு கைத்தேரிதேரியில் இருந்து வெளிக்கிட்டு மதியம் 12 மணிக்கு மீண்டும் கைத்தேரிதேரியினை அடைகின்றது.

படகில் இருந்து இயற்கைக்காட்சிகளை இரசிக்கத் தொடங்கினேன்.

சில நிமிடப்பயணத்தின் பெரிய பாறை ஒன்றினைக் கண்டோம். பார்ப்பதற்கு பிளவுபட்ட அப்பிள் போலக் காட்சி அளிப்பதினால் Split Apple Rock என்று அழைப்பார்கள். இப்பாறை உலகப் புகழ் பெற்றது. இதனைப் பார்ப்பதற்கு பலர் இங்கு வருவார்கள்.

தொடர்ந்து அழகிய இயற்கைக்காட்சிகளைப் பார்த்தபடி பயணித்தோம்.

படகு கடற்கரை ஒன்றினை நோக்கி சென்று கொண்டிருந்தது.

நியூசிலாந்து 44 - பிக்டனில் இருந்து ரிவாக்கா வரை

2012-01-12T22:05:00.001-08:00

பிக்டனில் இருந்து கவ்லொக் நோக்கி Queen Charlotte Drive வீதி வழியாக பயணித்தேன். Queen Charlotte Driveல் பயணிக்கும் போது அழகிய இயற்கைக் காட்சிகளைக் கண்டு இரசிக்கலாம். சுற்றுலாப் பயணிகள் இப்பகுதிகளில் பயணிக்கும் போது வாகனங்களை நிற்பாட்டி இயற்கை அழகினை இரசித்துப்பார்ப்பார்கள். இருள முதல் மொற்று எகாவிற்கு செல்ல வேண்டும் என்பதினால் ஒரிரு இடங்களிள் மட்டும் வாகனத்தினை நிற்பாட்டி புகைப்படங்களை எடுத்தேன்.

கவ்லொக்கினை அடைந்ததும் நெல்சனை நோக்கிப் பயணித்தோம்.

நெல்சனிலும் பார்ப்பதற்கு, சுற்றுலா செல்வதற்கு சில இடங்கள் இருக்கின்றன. நெல்சனை அடையும் போது மாலை 5.30 ஆகிவிட்டது. அங்கே இருந்த தாய்லாந்து உணவகமொன்றில் இரவு சாப்பாட்டினை வாங்கிக் கொண்டு மொற்று எகா நோக்கிப் பயணித்தோம். நாங்கள் அன்றைய இரவில் தங்க முன்பதிவு செய்த விடுதி மொற்று எகாவின் அருகில் இருக்கிற ரிவாக்கா (Riwaka)என்ற இடத்தில் உள்ளது.

நெல்சனில் இருந்து 45 நிமிட பயணதூரத்தில் தான் மொற்று எகா இருக்கின்றது. மேலும் 10 நிமிடங்கள் பயணித்தால் ரிவாக்கா என்ற இடம் வரும். ரிவாக்காவில் இருந்து 7,8 நிமிட தூரத்தில் Marahau என்ற இடம் இருக்கின்றது. இங்குதான் மறு நாள் நான் படகுப் பயணம் செய்யும் அபில் தஸ்மன் பூங்கா ஆரம்பிக்கின்றது. Marahau என்ற இடத்தினை அபில் தஸ்மன் கிராமம் என்றும் சொல்லுவார்கள்.

ரிவாக்காவினை அடையும் போது 6.30 ,7 மணியாகிவிட்டது. ஆனால் விடுதி இருக்கும் வீதியைக் காணமுடியவில்லை. வீதியில் செல்பவர்களைக் கேட்டுப் பார்த்து, அருகில் இருந்த எரிபொருள் நிலையத்தில் வேலை செய்பவரின் உதவியுடன் ஒருவாறு விடுதியினைக் கண்டுபிடித்தோம்.

நியூசிலாந்து 43 -பிக்டன்(Picton)

2012-01-10T22:13:00.000-08:00

வெலிங்டனில் இருந்து பிக்டனுக்கு செல்ல 3 மணித்தியாலம் கடல் பயணம் செய்யவேண்டும். பயணத்தின் இறுதி ஒரு மணித்தியாலம் புகழ்பெற்ற Marlborough Soundsக்கு ஊடாக பயணிக்க வேண்டும். நிலப்பரப்புக்கள் சூழவுள்ள மிகவும் குறுகலான இடம் தான் Marlborough Sounds.

வெலிங்டனில் காலை 10.25க்கு புறப்பட்ட கப்பல் பிக்டனை மதியம் 1.35 க்கு வந்தடைந்தது.

அன்று இரவினை Motueka(மொற்று எகா) என்ற இடத்தில் தங்குவதற்கு முன்பதிவு செய்திருந்தேன். பிக்டனில் இருந்து கிட்டத்தட்ட இரண்டரை மணித்தியாலம் பயணித்தால் மொற்று எகாவினை அடையலாம். இரவு நேரங்களில் குளிர் காலங்களில் நியூசிலாந்தில் சில இடங்களில் பயணிப்பது பாதுகாப்பற்றது என்பதினால் 6, 7 மணிக்கு முன்பாக Motuekaக்கு செல்ல விரும்பினேன். பிக்டனில் வாடகை வாகனத்தினை வாங்கும் போது நேரம் கிட்டத்தட்ட மாலை 2 மணியாகிவிட்டது. இன்னும் மதிய உணவு உண்ணவில்லை. 4 மணிக்கு பிக்டனை விட்டு வெளிக்கிட்டால்தான் 6.30 மணியளவில் Motuekaவை அடையலாம். இடையில் இருக்கும் இரு மணித்தியாலங்களில் ஒரு மணித்தியாலத்தினை மால்பரோ சவுண்டில்(Marlborough Sound) உள்ள மிகவும் அழகான பகுதிக்கு படகில் செல்ல விரும்பினேன். வெலிங்டனில் இருந்து பிக்டனுக்கு வரும் போது மல்பரோ சவுண்டின் ஒரு பகுதியூனூடாகப் பயணித்தாலும், மால்பரோ சவுண்டின் மிகவும் அழகான பகுதிக்கு செல்ல படகில் தான் பயணிக்க வேண்டும். படகில் பயணிக்க அருகில் இருந்த சுற்றுலா தகவல் நிலையத்துக்கு சென்றேன். ஆனால் அச்சமயத்தில் பயணிக்க படகுகளில் இடம் இருக்கவில்லை. மறு நாள் நான் Abel Tasman National Park( அபில் தஸ்மான் தேசிய பூங்கா)வில் படகுப் பயணம் செய்ய விரும்பினேன். படகில் 3 மணித்தியாலம் பயணிக்க வேண்டும். பல சுற்றுலாப் பயணிகள் படகில் செல்ல விரும்புவதினால் சிலவேளை படகில் இடம் கிடைக்காமல் போகலாம். இதனால் பிக்டனில் இருக்கும் சுற்றுலா தகவல் மையத்தின் மூலம் மறு நாள் அபில் தஸ்மான் தேசிய பூங்காவில் படகில் பயணிக்க முன்பதிவு செய்தேன். ஆனால் முன்பதிவு செய்யும் போது கிட்டத்தட்ட ஒரு மணித்தியாலம் சுற்றுலாத்தகவல் நிலையத்தில் காத்திருக்க வேண்டி இருந்தது. முன்பதிவு செய்ததும் உடனே அருகில் இருந்த ஆங்கில உணவகத்தில் potato chips வாங்கி உண்டபின்பு மூன்றரை மணியளவில் மொட்டுவெகாவை நோக்கிப் பயணித்தேன். பிக்டனில் இருந்து மொட்டுவேகாவுக்கு செல்ல நெல்சன்(Nelson) என்ற இடத்தினூடாக செல்ல வேண்டும். நெல்சனுக்கு செல்ல ஒரு மணித்தியாலமும் நாற்பத்தைந்து நிமிடங்களும் தேவை.

பிக்டனில் நெல்சனுக்கும் இடையில் இருக்கும் இடம் கவ்லொக்(Havelock). பிரதான வீதி(State Highway 6) பிக்டனில் ஆரம்பித்து பெலிங்கெம்(Blenheim)ஊடாக கவ்லொக் செல்கிறது. ஆனால் Queen Charlotte Drive என்ற புகழ் பெற்ற பாதையில் பயணித்தால் பெலிங்கெம் செல்லாமல் குறைந்த நேரத்தில்( 45 நிமிடங்களில்) கவ்லொக் செல்லலாம். ஆனால் இப்பாதை மிகவும் வலைந்து செல்லும் ஒடுக்கமானதாக இருக்கின்றது. அத்துடன் அழகான மால்பரோ சவுண்ட் கடற்கரையினுடாக செல்கின்றது.

'Queen Charlotte Drive' பாதை உயரமான இடத்தினூடாக ஆரம்பித்தது. பயணம் ஆரம்பித்து சில நிமிடங்களில் வாகனத்தினை நிறுத்தி பிக்டன் நகரின் இயற்கை அழகினைப் படம் பிடித்தேன்.

அழகிய இயற்கைக்காட்சிகளைப் படம் பிடித்தபின்பு பயணத்தினை தொடர்ந்தோம்.

நியூசிலாந்து 42 -மால்பொரோ சவுண்ட்(Marlborough Sounds)

2011-11-24T19:49:00.001-08:00

மால்பொரோ சவுண்டினூடாக(Marlborough Sounds) வெலிங்கடனில் இருந்து பிக்டனை நோக்கிக் கப்பலில் பயணிக்க வேண்டும். எனது நியூசிலாந்து அனுபவ இத்தொடரின் பகுதி 26ல் இருந்து 29 வரை மில்வேட் சவுண்ட்டில்(Milford Sound) பயணித்ததினை சொல்லியிருந்தேன். இரண்டு பயணங்களிலும் என்னை அதிகம் கவர்ந்தது மில்வேட் சவுண்ட். அழகிய இயற்கைக் காட்சிகளைக் கொண்டது மில்வேட் சவுண்ட்.

கப்பலில் ஒரு சிறிய திரை அரங்கும் இருந்தது. அங்கு திரையிடப்படும் திரைப்படத்தினைப் பார்க்க கட்டணம் செலுத்த வேண்டும். சிறுவர்கள் விளையாட சிறு விளையாட்டு இடம், உணவகம், கடை , இணையம் என பல வசதிகளை செய்திருந்தார்கள்.

நியூசிலாந்து 41 -வெலிங்டனில் இருந்து பிக்டன் வரை

2011-11-21T20:13:00.001-08:00

விமானம் இரவு 11. 30 க்கு வெலிங்டன் விமான நிலையத்தினை அடைந்தது. முன்பு பாடசாலையில் படிக்கும் போது சமுகக்கல்வி ஆசிரியர் ஒருவர் வெளினாட்டு நகரங்களின் பெயர்களை சொல்லுமாறு வகுப்பில் கேட்க நானும் சிட்னி, வெலிங்டன், இலண்டன் என்று பதில் அளிக்க ஆசிரியர் இவனுக்கு எப்ப பார்த்தாலும் சினிமா ஞாபகம் தான் என்று திட்டியது ஞாபகத்துக்கு வந்தது. யாழ்ப்பாணத்தில் இருந்த வெலிங்டன் திரையரங்கினைத் தான் சொல்கிறேன் என்று அவர் நினைத்திருந்தார். நான் துடுப்பாட்டப் போட்டிகளின் செய்திகளை ஆர்வமாகப் பார்க்கும் பழக்கம் இருப்பதினால் துடுப்பாட்டம் நடைபெறும் இடங்களில் ஒன்றான நியூசிலாந்தின் தலை நகர் வெலிங்கடனையும் எனக்கு தெரிந்த நகரங்களில் ஒன்றாக அப்பொழுது சொன்னேன்.

விமான நிலையத்தில் இருந்து விடுதிக்கு செல்ல இரவு 12.30 மணியாகிவிட்டது. மறு நாள் அதிகாலையில் எழும்பி வெலிங்டன் துறை முகத்தினை நோக்கிப் பயணித்தேன். ஏற்கனவே சிட்னியில் இருக்கும் போது ,கப்பலில் பயணிக்க முன் பதிவு செய்திருந்தேன். நான் பதிவு செய்த கப்பல் 10.25 மணியளவில் தான் தென் நியூசிலாந்தில் உள்ள பிக்டன்(Picton) நகரினை நோக்கிப் பயணிப்பதாக இருந்தது. கப்பல் பயணிக்க கிட்டத்தட்ட 45 நிமிடங்களுக்கு முன்பாகவே(9.40) பயணிகள் துறைமுகத்தில் நிற்க வேண்டும். கப்பலில் வாகனத்தினை ஏற்றி செல்லும் போது வாகனத்துக்கு மேலதிகமாக பணம் கட்ட வேண்டும். வாடகைக்கு வாகனத்தினை வெலிங்டன் விமான நிலையத்தில் முதல் நாள் இரவு எடுத்திருந்தேன். கப்பல் துறை முகத்திலே வாகனத்தினை திருப்பி தருவதாகவே பதிவு செய்திருந்தேன். இந்த நியூசிலாந்து சுற்றுலாவில் மொத்தம் 8 நாட்களுக்கும் ஒரே வாகனத்தில் சென்றிருக்கலாம். ஆனால் அப்படி செல்வதிலும் பார்க்க வெலிங்டன் விமான நிலையத்தில் இருந்து வெலிங்டன் துறைமுகத்துக்கு செல்ல ஒரு வாகனத்தையும், பிக்டன் துறை முகத்தில் இருந்து 7 நாட்கள் தென் நியூசிலாந்தினைப் பார்த்த பின்பு மறு படியும் பிக்டன் துறை முகத்துக்கு செல்ல 2 வது வாகனத்தினையும், வெலிங்டன் துறைமுகத்தில் இருந்து மறு நாள் வெலிங்டன் விமான நிலையம் வரை செல்ல 3வது வாகனத்தினையும் பதிவு செய்தேன். கப்பலில் வாகனத்தினை கொண்டு செல்வது அதிக பணம் என்பதினால் இவ்வாறு பதிவு செய்தேன். பொதுவாக நான் Hertz,Avis, Europcar போன்றவர்களிடம் தான் வாடகை வாகனங்களினைப் பெறுவதுண்டு. இவற்றினை வாடகைக்கு எடுப்பதினால் Air miles pointsனை பெறலாம். அத்துடன் ஒரு இடத்தில் வாடகைக்கு வாகனத்தினை எடுத்தால் வேறு இடங்களில் உள்ள அவ்வாகனநிலையங்களில் அவ்வாகனத்தினை திருப்பிக் கொடுக்கலாம்.

வெலிங்டனில் இருந்து பிக்டன் வரை Interislander ,bluebridge என்ற இரண்டு கப்பல்கள் பயணிக்கின்றது. நான் Interislander தான் பயணித்தேன். நியூசிலாந்தின் வடக்கு தீவில் இருந்து 3 மணித்தியாலம் கப்பலில் பயணித்தால் தான் தெற்கு தீவின் உள்ள பிக்டன் நகரை அடையலாம்.வெலிங்டனில் இருந்து பிக்டனுக்கு செல்லும் போது, கடைசி ஒரு மணித்தியாலம் புகழ் பெற்ற Marlborough Sounds என்ற பிரதேசத்திற்கூடாக பயணிக்க வேண்டும்.

நியூசிலாந்து 40 - வெலிங்டனை நோக்கிப் பயணம் ஆரம்பம்

2011-10-31T23:03:00.000-07:00

கன்மர் ஸ்பிரிங்கில் இருந்து வெளிக்கிட்டு கிறைஸ் சேர்ச்சினை நோக்கிப் பயணித்தோம்.

ஒன்றரை மணித்தியாலப் பிராயணத்துக்கு பிறகு மீண்டும் கிறைஸ் சேர்ச்சினை அடைந்தோம். மறு நாள் விமானத்தில் நியூசிலாந்தின் வடக்கு தீவான ஒக்லாண்டினை நோக்கிப் பறந்தோம். நியூசிலாந்தின் தெற்கு தீவில் பார்த்தவற்றை எழுதிமுடிந்ததும் வடக்கு தீவில் பார்த்தவற்றை பிறகு சொல்கிறேன்.

2009ம் ஆண்டிலும் நியூசிலாந்திற்கு 7 முழு நாட்கள் சுற்றுலா சென்றிருக்கிறேன். இம்முறை வடக்குத்தீவில் தென் மூலையில் இருக்கும் நியூசிலாந்தின் தலை நகர் வெலிங்டனுக்கு நியூசிலாந்து விமானத்தில் பயணித்தேன்.

வடக்கு தீவில் இருக்கும் வெலிங்டனை நோக்கி சிட்னியில் இருந்து விமானத்தில் பயணித்தாலும் இந்த ஏழு நாட்களும் தெற்கு தீவில் தான் சுற்றுலா சென்றேன்.. இலவச விமானசீட்டு என்பதினால் சிங்கப்பூர் எயர்லைன்சின் மூலம் தொலைபேசியில் தொடர்பு கொண்டு Star alliance உள்ள நியூசிலாந்து விமானத்தில் பறக்க நுளைவு சீட்டினைப் பெறவேண்டும். அச்சமயத்தில் கிறைஸ் சேர்ச் விமான நிலையத்துக்கு செல்ல இலவச விமான சீட்டு கிடைக்கவில்லை. வெலிங்டன் விமான நிலையத்துக்கு சென்று வரத்தான் நான் விரும்பிய நாளில் செல்ல விமான சீட்டு கிடைத்தது. இதனால் வெலிங்கடன் செல்ல நுளைவுச்சீட்டினைப் பெற்று அங்கிருந்து தெற்கு தீவிற்கு செல்ல விரும்பினேன். 2005, 2008ல் சென்ற போது பார்க்காத தெற்கு தீவில் உள்ள இடங்களுக்கே செல்ல விரும்பினேன். குறிப்பாக டனீடன் என்ற இடத்துக்கு செல்ல விரும்பினேன். சிட்னியில் இருந்தே, நியூசிலாந்தில் 9 இரவுகளில் தங்கும் விடுதிகளை முன்பதிவு செய்தேன்.

வெலிங்டன் விமான நிலைய ஓடு பாதை மிகவும் சிறியது என்பதினால் பெரும்பாலும் பெரியவிமானங்கள் வெலிங்டன் விமான நிலையத்துக்கு பறப்பதில்லை. ஒரு பக்கம் மலை மறுபக்கம் கடல் என இயற்கையாக அமைந்திருக்கும் இந்த விமான நிலையத்தில் விமானங்கள் இறங்கும் போது காற்றழுத்ததினால் சிலவேளைகளில் ஆடி ஆடித்தான் இறங்குகின்றன. விமானம் சிட்னியில் இருந்து வெலிங்கடனை நோக்கிப் பறக்க தொடங்கியது. சிட்னியில் இருந்து நியூசிலாந்தில் உள்ள எல்லா விமான நிலையங்களுக்கும் செல்ல 3 மணித்தியாலங்கள் தேவை. ஏயர் நியூசிலாந்தில் எனது இருக்கைக்கு முன்னால் அமைந்திருக்கும் தொலைக்காட்சியில் நியூசிலாந்தில் உள்ள முக்கிய இடங்களை குறிப்பாக இந்தப்பயணத்தில் பார்க்கவிருக்கும் இடங்கள் பற்றிய சுற்றுலாத்தகவல்களை பார்த்துக் கொண்டிருந்தேன்.

நியூசிலாந்து 39 - கன்மர் ஸ்பிரிங் (Hanmer Springs )

2011-08-15T18:29:00.001-07:00

கிறைஸ் சேர்ச்சில் இருந்து கன்மர் ஸ்பிரிங் நோக்கிய பயணத்தில் கன்மர் ஸ்பிரிங்க் கிட்டப் பயணிக்கும் போது 'Waiau Gorge' என்ற இடத்தில் ஒரு பாலத்தின் கீழ் பயணிக்க வேண்டும். பாலத்தின் கீழ் ஆறு ஒன்று ஒடிக்கொண்டிருந்தது.

அந்த ஆற்றில் வேகப்படகில் (Jet Boat) பயணிக்கலாம். அத்துடன் 'Bungy Jump' போன்றவற்றையும் செய்யலாம்.
நான் குயின்ஸ்டவூனில் இரண்டு வேகப்படகில் சென்றதினை (நியூசிலாந்த்து பகுதி -21,22) விபரித்திருக்கிறேன். சிட்னியிலும் வேகப்படகில் சென்றிருக்கிறேன். இதனால் நான் இங்கு பயணிக்க விரும்பவில்லை. அத்துடன் படகில் செல்ல கட்டணம் 99 நியூசிலாந்து வெள்ளிகள் செலுத்த வேண்டும். என்னுடன் வந்த உறவினர்களில் சிலர் படகில்சென்றார்கள். படகோட்டி ஏன் இப்படகில் நான் வரவில்லை சென்று கேட்டார். நான் குயின்ஸ்டவூனில் சென்றிருக்கிறேன் என்றேன். அங்கு சென்றதினை விட இங்கு பயணம் நன்றாக இருக்கும். நீண்ட தூரத்துக்கு ஒரு மணித்தியாலம் பயணிக்கலாம் என்று எனக்கு ஆசை காட்டினார். ஆனாலும் நான் படகில் ஏறாத உறவினர்களோடு அங்கே இருந்து அப்பகுதியின் இயற்கை காட்சிகளை இரசித்தேன்.

ஒரு மணித்தியாலத்தின் பின்பு படகில் இருந்து உறவினர்கள் வந்ததும் கன்மர் ஸ்பிரிங்க் வெப்பக்குளத்தினை நோக்கிப் பயணித்தோம்.

சில நிமிடப்பயணங்களின் பின்பு கன்மர் ஸ்பிரிங்க் வெப்பக்குளத்தினை அடைந்தோம். காடுகளுக்கும் மலைகளுக்கும் நடுவே இந்த விருது பெற்ற வெப்பக்குளங்கள் அமைந்திருக்கின்றன. ஒவ்வொரு குளங்களும் வெவ்வேறான வெப்ப நிலையில் இருந்தன.
இங்கு நான்கு 35ல் இருந்து 38 செல்சியஸ் டிகிரியில் அமைந்த பாறை குளங்கள் (Rock pools) இருக்கின்றன. 40ல் இருந்து 42 செல்சியஸ் வெப்பமான கந்தகக்குளங்கள் (Sulphur Pools) மூன்றும் இருக்கின்றன.36ல் இருந்து 37 செல்சியஸ் வெப்பமான Rainbow Pools இருக்கின்றன. ஆனால் 38 - 40 செல்சியஸ் வெப்பமுடைய மூன்று Hexagonal Pools குளங்களில் தான் பல சுற்றுலாப் பயணிகள் விரும்பிக்குளிப்பார்கள். 28 டிகிரி செல்சியஸில் இருந்து 42 டிகிரி செல்சியஸ் வரையிலான இக்குளங்கள் எல்லாவற்றிலும் குளித்துப் பார்த்தேன். இங்கு மசாஜ்,facial போன்ற உதவிகளையும் பெறக்கூடியதாக இருந்தது.

அத்துடன் நீந்துபவர்களுக்கும் இங்கு வசதி செய்யப்பட்டிருக்கின்றது.

சில மணித்தியாலங்கள் கன்மர் ஸ்பிரிங்கில் குளித்து பொழுதைப் போக்கிய பின்பு சூடான உணவினை உண்டபின்பு கிறைஸ் சேர்ச்சினை நோக்கிப் பயணித்தோம்.

நியூசிலாந்து 38 - கிறைஸ் சேர்ச்சில் இருந்தி கன்மர் ஸ்பிரிங்க் வரை

2011-07-27T23:50:00.000-07:00

முதல் 37 பதிவுகளில் நான் நியூசிலாந்து நாட்டின் தெற்குத் தீவுக்கு 2005ல் சென்ற போது ஏற்பட்ட அனுபவங்களை சொல்லி இருந்தேன். 2008ல் எனது பெற்றோர் சிட்னிக்கு வந்திருந்தார்கள். அவர்கள் தங்களது உறவினர்கள் வாழும் நியூசிலாந்தின் வடக்கு தீவில் இருக்கும் ஒக்லண்ட் நகரில் வசிக்கும் தங்களது உறவினர்களைப் பார்க்க விரும்பினார்கள். ஒக்லண்ட் நகரில் தான் ஈழத்தமிழர்கள் நியூசிலாந்தில் அதிகளவில் வாழ்கிறார்கள். பெற்றோரோடு வேறு உறவினர்களும் எங்களுடன் நியூசிலாந்துக்கு வர விரும்பினார்கள்.
நேரடியாக சிட்னியில் இருந்து ஒக்லண்டுக்கு செல்லுவதை விட, சிட்னியில் இருந்து நியூசிலாந்தின் தெற்குத் தீவில் இருக்கும் கிறைஸ் சேர்ச்சுக்கு சென்று அங்கிருந்து விமானத்தில் வடக்கு தீவில் இருக்கும் ஒக்லண்ட் சென்றால் மொத்த விமான சீட்டுக்கள் மலிவாக அச்சமயத்தில் கிடைத்தன. (எனக்கு சிங்கப்பூர் விமான புள்ளிகள் இருந்ததினால் இலவச பயணம் செய்யக்கூடியதாக இருந்தது. ) இதனால் நாங்கள் கிறைஸ் சேர்ச்சுக்கு(christchurch) சென்றோம். கிறைஸ் சேர்ச்சில் ஒரு நாள் பொழுதைப் போக்க விரும்பினோம். 2005 பயணத்தின் போது பார்க்காத கன்மர் ஸ்பிரிங்(hanmer springs) வெந்நீரூற்றுக்கு செல்ல விரும்பினேன். ஈழத்தின் நகரமான திருகோணமலையில் உள்ள பிரபல்யமான கன்னியா வெந்நீரூற்றினைப் போல நியூசிலாந்திலும் உள்ள கன்மர் ஸ்பிரிங்க் வெந்நீரூற்றும் பிரபல்யமானது.

அதிகப் பேருடன் சுற்றுலா சென்றால் நினைத்த நேரத்தில் விரும்பிய இடங்களுக்கு செல்ல முடியாது. மதிய உணவை கிறைஸ் சேர்ஸ் நகரத்தில் இருக்கிற இந்திய உணவகத்தில் உறவினர்கள் உண்ண விரும்பினார்கள்.சுற்றுலா செல்லும் போது இலங்கை, இந்தியா, சீனா, தாய், வியட்னாம் போன்ற உணவகங்களில் மதியம் உண்ணுவதை தவிர்ப்பதுண்டு. காரணம் அங்கே குறைந்தது ஒரு மணித்தியாலம் இருக்க வேண்டும். இரவு நேரங்களில் தான் இந்த உணவகங்களுக்கு செல்வதுண்டு. மதிய உணவகத்தினை இந்தியா உணவகம் ஒன்றில் உண்டோம். உணவகம் இருந்த பகுதிக்கு இப்பொழுது செல்ல ஒரு வித தயக்கம் இருக்கிறது. ஏன் நியூசிலாந்தும் செல்லவே தயக்கமாக இருக்கிறது. அண்மைக்காலங்களில் பாரிய நிலவதிர்வுகள் ஏற்பட்டு சிலர் கொல்லப்பட்டிருப்பதை கேள்விப்பட்டிருக்கிறோம்.

மதிய உணவை முடித்து விட்டு கன்மர் ஸ்பிரிங்கை நோக்கிப் பயணித்தோம். கிறைஸ் சேர்ச்சில் இருந்து கன்மர் ஸ்பிரிங்கிற்கு செல்ல 1.75 மணித்தியாலம் தேவை.(திரும்பிவர 3.50 மணித்தியாலம் தேவை).நான் நியூசிலாந்துக்கு 2008ல் சென்ற போது கோடை காலம். பெப்ரவரி மாதம். இருள நேரம் எடுக்கும்.

இயற்கைக் காட்சிகளை இரசித்துக் கொண்டு பயணித்தோம்.

நியூசிலாந்து 37 -கிறைஸ்சேர்ச் Gondola

2011-06-01T22:07:00.000-07:00

அந்தாட்டிக்கா நிலையத்தைப் பார்த்து முடிக்க கிட்டத்தட்ட மாலை 4 மணியாகி விட்டது. அன்றைய மாலைப் பொழுதினைப் போக்க கிறைஸ்சேர்ச்சில் உள்ள Gondola க்கு சென்றேன். மலையின் அடியில் இருந்து மலை உச்சிக்கு கம்பிகையிற்றினால்( cable car -gondola) மேலே செல்லவேண்டும். ஏற்கனவே நான் 3ம் நாள் பயணமன்று குயின்ஸ்டவுனில் உள்ள gondolaக்கு சென்றதினைப் பற்றி நியூசிலாந்து 20 ல் விபரித்திருந்தேன்.

மேலே ஏறியதும் அங்கிருந்து எனது புகைப்படக்கருவியினால் எடுக்கப்பட்ட கிறைஸ் சேர்ச் நகரத்தின் புகைப்படங்கள்.

அன்றைய இரவு உணவைக் கிறைஸ்சேர்ச்சில் உள்ள வட இந்திய உணவகத்தில் உண்டபின்பு, விடுதிக்கு சென்றேன். இவ்விடுதியில் தான் நியூசிலாந்துக்கு வந்த போது முதல் நாள் இரவு தங்கியிருந்தேன். மறு நாள் அதிகாலை சிட்னியை நோக்கி விமானத்தில் பறந்தேன்.

இதுவரை காலமும் நியூசிலாந்து நாட்டின் தெற்குத்தீவில் உள்ள முக்கிய இடங்களுக்கு 2005ம் ஆண்டில் பயணித்த சம்பவங்களை இங்கு உங்களுடன் பகிர்ந்திருந்தேன். நியூசிலாந்த்துக்கு 2008ம் ஆண்டிலும் ,2009ம் ஆண்டிலும் பயணம் சென்றேன். 2008ல் வடக்கு தீவிற்கும், தெற்கு தீவிற்கும் பயணித்திருந்தேன். 2009ல் தெற்கு தீவில் மட்டுமே(வெலிங்டனைத் தவிர) பயணித்திருந்தேன். 2008ல் தெற்குத்தீவில் பார்த்தவற்றை அடுத்த பதிவில் இருந்து பார்க்கலாம்.

நியூசிலாந்து 36 - அந்தாட்டிக்கா நிலையம்(Antarctic Centre )

2011-05-10T22:18:00.001-07:00

நியூசிலாந்தின் தென் நிலப்பரப்பில் அதிக மக்கள் வாழும் கிறைஸ்சேர்ச்சினை மதியம் ஒரு மணியளவில் அடைந்தேன். இங்குதான் நியூசிலாந்துப்பயணத்தின் ஏழு நாட்களில் வீதிகளில் மக்களையும், வாகனங்களையும், வர்த்தக நிலையங்களையும் அதிகளவில் கண்டேன். காலை உணவு உண்ணாததினால் பசியெடுக்க, வீதியில் தென்பட்ட மக்டோனால் உணவகத்தில் அன்றைய மதிய உணவினை உண்டேன். உண்டபின்பு கிறைஸ் சேர்ச் விமான நிலையத்துக்கு அருகில் உள்ள அந்தாட்டிக்கா நிலையத்தினை அடைந்தேன். இங்கு அந்தாட்டிக்கா கண்டத்தைப் பற்றி பல தகவல்களை அறியலாம். சுற்றுலாப் பயணிகள் அந்தாட்டிக்காவுக்கும் சுற்றுலா செல்வதுண்டு. நான் தொழில் செய்யும் இடத்தில் கணக்காளராக இருந்த சீனா நாட்டுப் பெண்மணி அந்தாட்டிக்காவுக்கு சுற்றுலா சென்று வந்த புகைப்படங்களை முன்பு காட்டியிருந்தார்.

அந்தாட்டிக்காவில் விஞ்ஞானிகள் பனிக்கட்டிகள் உள்ள இடங்களில் பிரயாணம் செய்யும் போது Hagglund என்ற வாகனத்தில் பயணிப்பார்கள். அவர்கள் குன்றின்மீதும், நீர்நிலைகளிலும் பயணிப்பார்கள்.அதே மாதிரியான Hagglund வாகனத்தில் நாங்கள் குன்றின்மீதும், சிறு நீர்நிலையிலும் பயணித்தோம். பயணத்தின் போது வாகன சாரதி, எங்களுக்கு பல தகவல்களைத் தந்தார்.

பூச்சியத்துக்கு கீழ் ஐந்து பாகை(-5 ) வெப்பநிலையில் இருக்கக்கூடிய அறை ஒன்றிற்கு சென்றோம். அவ்வறையை அந்தாட்டிக்காவைப் போல செயற்கையாக செய்திருந்தார்கள். சடுதியாக பூச்சியத்துக்கு கீழ் 18 பாகை(-18) வெப்பநிலைக்கு அறையின் வெப்பநிலையினைக் கொண்டுவந்தார்கள். அந்தாட்டிக்காவில் புயல் வீசுவது போல அவ்வெப்பநிலையில் காற்று மணித்தியாலத்திற்கு 40கிலோமிற்றர் வேகத்தில் பலமாக வீசியது. ஒவ்வொரு 30 நிமிடத்துக்கும் ஒருமுறை இக்காற்று அவ்வறையில் வீசுவதற்கு ஏற்றவகையில் அமைக்கத்திருந்தார்கள். இவ்வறைக்கு செல்லுவதற்கு சூடான ஆடையினை அணியவேண்டும். அத்துடன் பெரிய குளிரைத்தாங்கக் கூடிய பாதணியினையும் அணிய வேண்டும்.

அந்தாட்டிக்கா கண்டத்தில் காணப்படும் சிறிய நீல நிறப் பென்குயின்களை இந்த அந்தாட்டிக்கா நிலையத்தில் பார்க்கலாம்.

அந்தாட்டிக்கா கண்டத்தில் உள்ளதுபோல பல உருவங்கள் செய்து இங்கு காட்சிப் படுத்தி இருக்கிறார்கள்.

இன்னுமொரு அறையில் பல மில்லியன் வருடங்களுக்கு முன்பு எல்லாக் கண்டங்களும் ஒன்றாக இருந்து எவ்வாறு பிரிந்து சென்றன என்பவற்றைக் காணொளிகளில் காண்பித்தார்கள். அந்தாட்டிக்கா பற்றிய மேலும் பல சுவையான தகவல்களை இவ் அந்தாட்டிக்கா நிலையத்தில் அறிந்தேன்.

நியூசிலாந்து 35 -'Tekapo' ஏரியில் இருந்து கிறைஸ் சேர்ச் வரை

2010-12-14T21:37:00.001-08:00

'Tekapo' ஏரியில் இருந்து கிறைஸ் சேர்ச் செல்ல கிட்டத்தட்ட மூன்று மணித்தியாலங்கள் தேவை.

'Lake Tekapo' நகரத்தில் நிற்காது தொடர்ந்து கிறைஸ் சேர்ச்சினை நோக்கிப் பயணித்தேன்.

நியூசிலாந்தின் தென் நிலப்பரப்பில் போகும் வழிகளில் செம்மறி ஆடுகளைக் காணலாம். முன்பு வீதிகளில் அடிக்கடி செம்மறி ஆடுகள் செல்வதினால், வாகனங்களில் செல்பவர்களுக்கு இடையூறாக இருந்தன. இப்பொழுது வீதி ஓரங்களில் கம்பி வேலிகள் இருப்பதினால் செம்மறி ஆடுகள் வீதிகளுக்கு செல்ல முடிவதில்லை.

'Mount Hutt' என்ற இடத்தினைக் கடந்தபின்பு Rakaia நதியினைக் கண்டேன். படத்தில் தூரத்தில் வெள்ளை நிறமாகத் தெரிகிற நதி தான் Rakaia

போகிற வழியில் ஒரு பாலத்தின் மேலாகப் பயணித்தேன். பாலத்தின் கீழ் Rakaia நதி ஒடிக் கொண்டிருந்தது.

தொடர்ந்து கிரைஸ்ச் சேர்ச்சினை நோக்கிப் பயணித்தேன்.

மதியம் ஒரு மணியளவில் கிறைஸ்சேர்ச்சினை அடைந்தேன்

நியூசிலாந்து 34 -டுவைசலில் இருந்து 'Tekapo' ஏரிவரை

2010-11-21T20:49:00.000-08:00

குக்மலை நகரத்தில் இருந்து கிறைஸ்சேர்ச்சினை நோக்கிய பயணத்தில் டுவைசலில் நிக்காது தொடர்ந்து பயணித்தேன். குக்மலை நகரத்தின் அருகில் இருந்து ஆரம்பித்த புககி ஏரியின்(Lake pukaki)அழகை இரசித்துக் கொண்டு பயணித்தேன். குக் மலை நகரத்தில் இருந்து கிரைஸ்சேர்ச்சுக்கு பயணிக்கும் போது இவ்வேரியினைக் கடக்க ஒரு மணித்தியாலத்திற்கு மேல நேரம் தேவைப்பட்டது. இவேரியின் நிறமும் டுவைசல் பகுதியில் பார்த்த ஏரிகளின் நிறமும், மற்றைய இடங்களில் பார்த்த ஏரியின் நிறத்தை விட வித்தியாசமான நீல நிறத்தில் காணப்பட்டன.

புகைப்படத்தில் தெரிவது குக் மலை நகரத்தில் உள்ள மலைகள்.

புகாகி ஏரியில் இருந்து கிறைஸ்சேர்ச் வரையிலான பகுதிகள் பச்சைப் பசேலென அழகாக இருந்தாலும், இதுவரை நான் விபரித்த (முதல் முப்பத்தி மூன்று பகுதிகளில்) நான் பயணித்த இடங்களின் அழகினை விட அழகு குறைந்தது போல எனக்குத் தென்பட்டது.

காலையில் உணவினை உண்ணாததினால் பசிக்கத் தொடங்கியது. எனினும் போகிற வழியில் உணவகங்கள் ஒன்றும் தென்படவில்லை. Tekapo ஏரிப்பகுதியிலும் பார்ப்பதற்கு பெரிதாக இல்லை .'Lake Tekapo' நகரத்தில் நிற்காது தொடர்ந்து கிறைஸ் சேர்ச்சினை நோக்கிப் பயணித்தேன்.

நியூசிலாந்து 33 -குக் மலை(Mount Cook)

2010-11-17T20:58:00.000-08:00

கால நிலை சரியில்லாததினால் குக் மலைக்கு(Mount Cook)ஆறாம் நாள் செல்ல முடியவில்லை. எனவே ஏழாம் நாள் காலையில் இந்த மலைக்கு செல்ல விரும்பினேன்.

7ம் நாள் பயணம்

காலையில் பெற்றோல் நிலையத்தில் வாகனத்துக்கான பெற்றோலைப் பெறும் போது, பெற்றோல் நிலையத்தில் இருந்த சிப்ஸ், விசுக்கோத்துகளை வாங்கி உண்டபின்பு குக் மலைக்கிராமத்தை நோக்கிப் பயணித்தேன். டுவைசலில் நல்ல உணவு முதல் நாள் கிடைக்காததினால் போகிறவழியில் வாங்கி உண்ணலாம் என முடிவெடுத்தேன். நியூசிலாந்தில் அதி உயரமான மலை குக் மலை. குக் மலை தான் அவுஸ்திரெலியாக் கண்டத்தில் மிக உயரமான மலை. மலையில் ஏற விரும்புபவர்களுக்கு விருப்பமான சவாலான மலை இது. டுவைசலில் இருந்து குக் மலைக்கு செல்லும் போது 'Lake pukaki' என்ற ஏரியைக் காணலாம்

நாற்பத்தைந்து நிமிடங்களில் குக் மலை நகரத்தை அடைந்தேன்.

உண்மையில் ஆறாம் நாள் பிரயாணத்தின் போது தான் நான் குக் மலைக்கு செல்வதாக முடிவெடுத்திருந்தேன். ஆனால் சீரற்ற காலநிலையினால் ஆறாம் நாள் மதியத்தில் இருந்து மாலை வரை டுவைசலில் உள்ள விடுதியில் தான் தங்கியிருந்தேன். ஏழாம் நாள் கிறைஸ்ச்சேர்ச்சுக்குப் பயணிக்க வேணுமென்பதினால் குக் மலைக் கிராமத்தை அடைந்ததும் உடனே திரும்பி டுவைசல் வழியாக கிறைஸ்ச்சேர்ச்சினை நோக்கிப் பிரயாணித்தேன். நேரமின்மையினால் குக் மலையில் சுற்றுலா ஒன்றும் செய்யவில்லை.

குக் மலையில் இருந்து டுவைசல் செல்ல நாற்பத்தைந்து நிமிடங்கள் தேவை.

டுவைசலை அடைந்ததும் அங்கு நிக்காது கிறைஸ்சேர்ச்சினை நோக்கிப் பிரயாணித்தேன். டுவைசலில் இருந்து கிறைஸ் சேர்ச்சுக்கு Lake Tekapo என்ற ஏரி இருக்கும் இடத்தினூடாக செல்ல வேண்டும். டுவைசலில் இருந்து Lake Tekapo செல்ல எழுபத்தைந்து நிமிடங்கள் தேவை.

நியூசிலாந்து 32 -டுவைசல்(Twizel) நகரத்தில் எனக்குக் கிடைத்த ஏமாற்றம்

2010-11-14T21:09:00.000-08:00

டுவைசல்(Twizel) என்ற இடம் குயின்ஸ்டவுனில் இருந்து குக் மலைக்கு(Mount Cook) செல்லும் பாதையின் இடதுபக்கத்தில் இருக்கிறது. நான் பார்த்த சல்மொன் மீன் கடை வலதுபக்கத்தில் இருக்கிறது. டுவைசலில் அன்றைய மதிய உணவினை உண்ணலாம் என்று உணவகங்களைத் தேடிப் பார்த்தால் பெரும்பாலனாவை ஆங்கில உணவகங்களாகவே இருந்தன. ஆகவே ஒரு உணவகத்தில் பாண் துண்டுகளுடன் சூடான சூப்பினை வாங்கி உண்டேன். உண்டு விட்டு வெளியே வரும் போது ஒரு மறைவில் சீனர்களின் உணவகத்தைக் கண்டேன். அன்று இரவு சீனர்களின் உணவகத்தில் உண்ணலாம் என்னும் போது இடியுடன் கூடிய பெரு மழை பெய்தது. அருகில் இருக்கும் சுற்றுலா தகவல் மையத்துக்கு சென்றேன். நான் பொதுவாக சுற்றுலா செல்லும் போது இணையத்தளங்களின் ஊடாக சுற்றுலா செல்லமுன்பு பல தகவல்களைப் பெறுவேன். நியூசிலாந்துக்கு பயணிக்கமுன்பே பல தகவல்களைப் பெற்றுவிட்டேன். நியூசிலாந்து கிரைஸ்சேர்ச் விமான நிலையத்தில் உள்ள சுற்றுலா தகவல் மையத்தில் தென் நியூசிலாந்தில் உள்ள முக்கிய இடங்களின் சுற்றுலா பற்றிய சிறு சிறு புத்தகங்களைப் பெற்றேன். மறுநாள் செல்ல வேண்டிய இடங்கள் பற்றி முதல் நாள் இரவு புத்தகங்களை வாசித்து சில தகவல்களைப் பெறுவதுண்டு. ஆனால் அன்று (ஆறாம்) நாள் பயணத்தில் பயணித்த குரொம்வெல்(Cromwell), ஒமராமா(Omarama), டுவைசல்(Twizel) ஆகிய இடங்களைப் பற்றி புத்தகங்களில் இணையத்தளங்களில் பெரிதாகச் சொல்லவில்லை. குக் மலை(Mount Cook) பற்றியே சொல்லியிருந்தார்கள். எதுக்கும் டுவைசலைப் பற்றி அறியலாமே என்று சுற்றுலா தகவல் மையத்துக்கு சென்றேன். அன்று காலநிலை சரியில்லை, மழை அதிகம் பெய்யும் என்பதினாலும் குக் மலைக்கு செல்ல வேண்டாம் என்றும், குக் மலை பகுதியில் உள்ள சுற்றுலாக்கள்(உ+ம்... பனிச் சறுக்கி விளையாடுதல், உலங்கு வானூர்தி, வானூர்திகளில் பயணித்தல் ) அன்று நடைபெறாது என்றும், டூவைசலில் பார்ப்பதற்கு பெரிதாக இல்லை என்றும் பார்க்க விரும்பினால் சல்மொன் மீன் பண்ணைக்கு சென்று பார்க்கலாம் என்று சுற்றுலா தகவல் மையத்தில் இருந்தவர் சொன்னார். ஏற்கனவே சல்மொன் மீன் பண்ணைக்கு சென்றதினால் வேறு என்ன பார்க்கலாம் என்று கேட்க, 'The Lord of the Rings' என்ற ஆங்கிலத்திரைப்படம் எடுக்கப் பட்ட இடத்துக்கு சென்று பார்க்கலாம் என்று சொன்னார்.

மழை விட்டதும் 'The Lord of the Rings' திரைப்படம் எடுக்கப்பட்ட இடத்தை நோக்கிப் பயணித்தேன். போகும் வழியில் பார்த்த ஏரியினைக் கீழே உள்ள படங்களில் காணலாம்.

The 'Lord of the Rings' படம் எடுக்கும் போது அங்கு கட்டப்பட்ட கூடாரங்கள் எல்லாம் நான் சென்றபொழுது அகற்றப்பட்டதினால் அங்கு பார்ப்பதற்கு ஒன்றும் இருக்கவில்லை. வெளியான நிலப்பரப்பினையே பார்த்தேன்.

மீண்டும் மழை பெய்யத் தொடங்கியது. இதனால் மீண்டும் சுற்றுலா தகவல் மையத்துக்கு செல்ல ' The Lord of the Rings ' திரைப்படத்தில் நடித்த பாத்திரங்களின் உடைகளைஅணிந்து புகைப்படம் எடுக்க விரும்பினால் அதற்கு ஒழுங்கு செய்து தரப்படும் என்று சுற்றுலாத் தகவல் மையத்தில் வேலை பார்ப்பவர் சொன்னார். ஆனால் அதற்கு ஆறுபது நியூசிலாந்து வெள்ளிகள் பணம் கட்டணம் செலுத்த வேண்டும் என்றார். ஆறுபது வெள்ளிகளை ஏன் தண்டமாகக் கொடுக்க வேண்டும் என்பதினால் அன்று இரவு தங்கவேண்டிய இடத்துக்கு சென்றேன். சுற்றுலா தகவல் மையத்துக்கு மிக அருகில் தங்கவேண்டிய விடுதி(Mountain Chalet Motels) இருந்தது.

நேரம் கிட்டத்தட்ட மதியம் ஒரு மணி இருக்கும். நியூசிலாந்தில் இரண்டு மணிக்குப் பிறகு தான் பெரும்பாலான விடுதிகளில் தங்குவதற்கு அனுமதி கிடைக்கும். மழை பெய்வதினாலும், விடுதி ஏற்கனவே சுத்தம் செய்யப்பட்டதினாலும் விடுதி உரிமையாளர் ஒரு மணிக்கே விடுதியில் தங்க அனுமதியளித்தார். தொடர்ந்து மழை பெய்தது. தொடர்ந்து மழை பெய்வதினால் ஒன்றும் பார்க்க முடியவில்லையே என்பதினால் விடுதியில் சென்று ஏமாற்றத்துடன் தூங்கினேன். மாலை நான்கு,ஐந்து மணியளவில் மழை விட, எதுக்கும் குக் மலைக்கு செல்லக்கூடிய தூரம் வரை செல்லலாம் என நினைத்து குக் மலையை நோக்கிப் பயணித்தேன். டுவைசலில் இருந்து குக் மலைக்கு செல்ல நாற்பத்தைந்து நிமிடங்கள் தேவை. ஆகவே போய் வர தொன்னூறு நிமிடங்கள் தேவை.

போகும் வழியில் எடுக்கப் பட்ட புகைப்படங்கள்.

இருளத்தொடங்க இடைவெளியில் திரும்பி மீண்டும் டுவைசலை அடைந்தேன். மறு நாள் காலை குக் மலை வரை போய்ப் பார்த்துவிட்டு கிறைஸ் சேர்ச்சிற்கு செல்லலாம் என நினைத்தேன். விடுதிக்கு வந்தபின்பு மதியம் பார்த்த சீன உணவகத்தில் உணவினை வாங்கி, விடுதியில் உணவினை உண்டேன். அவ்வுணவு உரூசியற்றதாக இருந்தது. அன்று நான் விரும்பியது போல எல்லாம் நடக்கவில்லை.

நியூசிலாந்துக்குப் பயணிக்கும் போது குக் மலைப் பகுதியில் தான் உலங்குவானூர்திப் பயணம் மேற்கொள்ள வேண்டும் என நினைத்திருந்தேன். ஆனால் இரண்டாம் நாள் பயணத்தின் போது நான் தங்கியிருந்த விடுதி உரிமையாளரின் ஆலோசனைப் படி வோக்ஸ் கிளேசியரில் உலங்கு வானூர்தியில் பயணத்தேன். கால நிலை சரியில்லை என்பதினால் டூவைசலில் நான் நின்றபோது உலங்குவானூர்திகள் அன்று குக் மலைப்பகுதிகளில் சுற்றுலாக்களில் ஈடுபடவில்லை.

நியூசிலாந்து 31 -டுவைசல்(Twizel) சல்மொன்(Salmon) மீன் பண்ணை

2010-11-11T20:43:00.001-08:00

குரொம்வெல்லில் இருந்து டுவைசிலை நோக்கிய பயணத்தில் லின்டிஸ் பாசின் (Lindis Pass) இயற்கை அழகை இரசித்த பின்பு ஒமரமாவை(Omarama) அடைந்தேன்.ஒமரமாவில் பார்ப்பதற்கு பெரிதாக ஒன்றும் இருக்கவில்லை. எனவே அங்கு நிற்காமல் டுவைசிலை நோக்கிப் பயணித்தேன். ஒமரமாவில் இருந்து முப்பது நிமிடங்கள் பயணித்தால் டுவைசலை(Twizel) அடையலாம்.

நியூசிலாந்தில் ஒக்லண்டில்(வட நியூசிலாந்தில் இருக்கிறது) தான் அதிகளவு மக்கள் வசிக்கிறார்கள். நியூசிலாந்தின் சனத்தொகையின் மூன்றில் ஒரு பங்கிற்கு மேற்பட்டவர்கள் ஒக்லாண்டில் வசிக்கிறார்கள். வட நியூசிலாந்தில் தான் அதிகமக்கள் வசிக்கிறார்கள். தென் நியூசிலாந்தில் வசிப்பவர்களில் பெரும்பாலோர் கிறைஸ்ட் சேர்ச்சில் தான் வசிக்கிறார்கள். டனிடனிலும் நல்ல சனத்தொகை இருக்கிறது . தென் நியூசிலாந்தில் மற்றைய இடங்களில் சனத்தொகை மிகமிகக் குறைவு. பெரும்பாலான இடங்களில் மலைகளையும், ஏரிகளையும், வெளிகளையும் தான் காணலாம்.இங்கே வீடுகள், கட்டடங்கள், தோட்டங்களைக் காணமுடியாது. வீதிகளிலும் வாகனங்களைக் காணமுடியாது. பெரும்பாலான இடங்களுக்கு செல்ல ஒரே ஒரு வீதி மட்டுமே இருக்கும். அதுதான் பிரதான நெடுஞ்சாலை.

டுவைசலை மதியம் 12 மணியளவில் அடைந்தேன். இப்பகுதியில் உள்ள ஏரிகளின் நிறம் மற்றைய இடங்களில் உள்ள ஏரியின் நிறங்களை விட வித்தியாசமான நில நிறமாகக் காணப்பட்டது.

நெடுஞ்சாலையின் அருகில் சல்மொன்(Salmon) வகையிலான மீன்கள் விற்பனை செய்யும் பண்ணையினைக் கண்டேன். இவ்வகையான மீன்களை அட்லாண்டிக், பசுபிக் கடல்களில் காணலாம். இம்மீன்கள் ஏரிகள், நதிகளில் உற்பத்தியாகின்றன. அதாவது உப்புச்செறிவற்ற குடிக்க கூடிய நீர்நிலைகளில்(Fresh water) உற்பத்தியாகின்றன. பிறகு இம்மீன்கள் சமுத்திரத்தினை நோக்கி நகரும். மீன்குட்டிகளை உற்பத்தி செய்ய மீண்டும் உப்புச் செறிவற்ற இடங்களை நோக்கி இம்மீன்கள் நகருகின்றன. இப்பண்ணையில் இருக்கிற ஏரியில் இம்மீன்களை வளர்க்கிறார்கள். இப்பண்ணைக்கு வரும் மக்கள் ஏரியில் உள்ள விருப்பமான மீன்களை தெரிவு செய்து வாங்கிக் கொண்டு செல்கிறார்கள். சில சுற்றுலாப் பயணிகள் இம்மீன்களைப் பார்ப்பதற்காக இங்கே செல்கிறார்கள். பண்ணை உரிமையாளர்கள் மீன்களுக்குத் தேவையான உணவினை சுற்றுலாப் பயணிகளுக்கு கொடுக்க, சுற்றுலாப் பயணிகள் ஏரிகளில் உணவினைத் தூவுவார்கள். மீன்களும் மேலே எழுந்து உணவினை நோக்கிப் பாய்வதைப் பார்த்து இரசிப்பார்கள்.

நானும் பண்ணை உரிமையாளரிடம் இருந்து மீன்களுக்குத் தேவையான உணவினை பெற்று ஏரியில் தூவ மீன்கள் உணவினை நோக்கிப் பாய்ந்தன.

நியூசிலாந்து 30 - அழகிய லின்டிஸ் பாஸ் (Lindis Pass)

2010-11-01T20:45:00.001-07:00

குரொம்வெல்லில் இருந்து டுவைசிலை நோக்கிப் பயணிக்கும் போது அழகிய ஏரி(Lake Dunstan) ஒன்றினை வீதி ஓரத்தில் கண்டேன்.

அச்சமயத்தில் அங்கு பறந்து வந்த உலங்குவானூர்தி ஒன்று வாளியினால் ஏரியில் இருந்து நீரைப் பெற்று மலை உச்சிக்கு சென்று நீரை உற்றியது. இவ்வாறே தொடர்ந்து செய்து கொண்டிருந்தது. மலை உச்சியில் உள்ள தாவரங்களுக்கு நீரைப் பாச்சுவதற்காகவா இவ்வாறு உலங்குவானுர்தி செயல் பட்டது? அல்லது வேறு காரணமா?

தொடர்ந்து பயணிக்கும் போது பார்த்தவை

தொடர்ந்து Lindis Pass என்ற இடத்தினுடான பயணித்தேன். குளிர்காலங்களில் இவ்விடம் இன்னும் அழகாக இருக்கும்.

நியூசிலாந்து 29 - மில்வேட் சவுண்டில் இருந்து குரொம்வெல் வரை

2010-10-26T23:00:00.001-07:00

'underwater observatory'க்கு சென்று கடல் உயிரினங்களைப் பார்த்த பின்பு படிகளினூடாக மேலே வந்து கப்பலுக்காகக் காவல் இருந்தோம். சில நிமிடங்களில் கப்பல் ஒன்று வந்தது. கப்பலின் மேல் தளத்துக்கு சென்று இயற்கைக்காட்சிகளை இரசித்தேன்.

கப்பல் பயணம் முடிவடைந்ததும், மில்வேட் சவுண்டில் காலை உணவு உண்ட இடத்தில் sandwichனை வாங்கி உண்டபின் குயின்ஸ்டவுனை நோக்கிப் பயணித்தேன். அன்றைய இரவு தங்குவதற்கு குயின்ஸ்டவுனில் மூன்றாம் நாள் பயண முடிவில் தங்கியிருந்த விடுதியில் பதிவு செய்திருந்தேன். மில்வேட் சவுண்டில் இருந்து ரி-ஆனாக்குச் செல்ல இரண்டு மணித்தியாலம் எடுக்கும். ரி-ஆனாவில் இருந்து குயின்ஸ்டவுனுக்குச் செல்ல மேலும் இரண்டு மணித்தியாலமும், பதினைந்து நிமிடங்களும் தேவை. ஆக மொத்தம் நான்கு மணித்தியாலமும், பதினைந்து நிமிடங்களும் தேவை.தென் நியூசிலாந்தில் பெரும்பாலான இடங்களில் இருள முதல் பயணிப்பது நல்லது. மலைகளினூடாக இருளில் பயணிப்பது நல்லதல்ல. வந்த பாதையினால் தான் திரும்பிச் செல்ல வேண்டும். ஏற்கனவே நியூசிலாந்து பதிவு 23, 25ல் குயின்ஸ்டவுனில் இருந்து மில்வேட் சவுண்ட்வரை சென்றபோது பார்த்தவற்றை விபரித்திருப்பதினால் இங்கு நான் மறுபடியும் விபரிக்கவில்லை.

மாலை ஆறு மணியளவில் குயின்ஸ்டவுனை அடைந்தேன். குயின்ஸ்டவுனில் மூன்றாம் நாள் இரவு தாய் நாட்டு உணவகமொன்றில் உணவை உண்டதினால், அன்றைய இரவு வட இந்திய உணவகமொன்றில் உணவை உண்டேன். அருகில் இருந்த சுற்றுலாத் தகவல் மையத்தில் மறு நாள் செல்லவுள்ள 'Cromwell','Omarama' போன்ற இடங்களில் என்ன பார்க்கலாம் என்று வினாவினேன். அங்கு பார்ப்பதற்கு பெரிதாக இடங்கள் இல்லை என்று சொன்னார்கள். மறு நாள் இரவு Twizelல் தங்க பதிவு செய்திருந்தேன்.

6ம் நாள் பயணம்

ஆறாம் நாள் காலை விடுதியில் உணவினை உண்டபின் (இவ்விடுதியில் தான் மூன்றாம் நாள் தங்கி இருந்தேன். இவ்விடுதியில் தங்குபவர்களுக்கு இலவசமாக காலை உணவு வழங்கினார்கள்) எனது பயணத்தினை டுவைசலை(Twizel) நோக்கி ஆரம்பித்தேன். 'Cromwell','Omarama' போன்ற இடங்களின் ஊடாகப் பயணிக்க வேண்டும். குயின்ஸ்டவுனில் இருந்து ஒமரமாவுக்குச்(Omarama) செல்ல இரண்டு மணித்தியாலம் தேவை. இரு இடங்களுக்கும் இடையில் இருப்பது குரொம்வெல்(Cromwell)

குயின்ஸ்டவுன் விடுதியில் இருந்து டுவைசலை நோக்கிச்செல்லும் போது கிட்டத்தட்ட பத்து நிமிடப் பயணமுடிவில் ஒரு பாலத்தினைக் காணலாம். இப்பாலத்தின் மேல்தான் பயணிக்க வேண்டும். அப்பாலத்தில் இருந்து சிலர் கால்களைக் கையிற்றினால் கட்டப்பட்ட நிலையில் கீழே பள்ளத்தாக்கினுள் குதித்தார்கள்(Bungy Jump). பள்ளத்தாக்கினுள் ஏரி ஒன்று ஒடிக் கொண்டிருந்தது. கால்கள் கையிற்றினால் கட்டப்பட்டு இருப்பதினால் தலை கீழாக விழ வேண்டும்.

குதிப்பதற்கு கட்டணம் செலுத்த வேண்டும். ஏன் காசைக் குடுத்து சித்திரவாதைப் பட வேண்டும் என நினைத்து தொடர்ந்து பயணித்தேன்.

ஐம்பது நிமிடங்களில் குரொம்வெல்(Cromwell) என்ற இடத்தை அடைந்தேன். அங்கு அப்பிள், பியர்ஸ் போன்ற பழங்களின் சிலைகளை வீதியில் கண்டேன்.

அங்கே உள்ள சுற்றுலா தகவல் மையத்தில் குரொம்வெலில் பார்க்கக்கூடிய இடங்கள் எவை என்று கேட்க, அங்கே பொதுவாக வைன் தோட்டம் இருப்பதாகவும் வைன்(Wine -திராட்சைப் பழச் சாற்றினால் செய்யப்படும் குடிவகை) தோட்டத்திற்கு சுற்றுலா செல்லலாம் என்றும் சொன்னார்கள். அவ்விடத்தில் பார்க்கக்கூடிய வேறு இடங்கள் இல்லை என்பதினாலும் சிட்னிக்கு வெளியே உள்ள Hunter Valleyயில் ஏற்கனவே பெரிய வைன் தோட்டங்களைப் பார்த்ததினாலும் டுவைசலை நோக்கிப் பயணித்தேன்.

நியூசிலாந்து 28 -மில்வேட் சவுண்ட் underwater observatory

2010-10-18T22:27:00.000-07:00

கப்பல் நீரின் உள் இருப்பதைப் பார்க்கக்கூடிய(underwater observatory ) இடத்தை அடைந்தது. இவ்விடம் Harrison Cove என்ற இடத்தில் இருக்கிறது. இந்த observatoryக்குச் செல்ல நுளைவுச்சீட்டு வைத்திருப்பவர்களை அங்கே இறக்கி விட்டு கப்பல் பயணித்தது. நான் நுளைவுச்சீட்டினை வைத்திருந்ததினால் நீரின் அடியில் இருப்பதைப் பார்க்க சென்றேன். வட்டவடிவில் அமைக்கப்பட்ட அவ்விடத்தின் மேற்பகுதியில் இருந்து அடிப்பகுதிக்கு செல்ல படிக்கட்டுக்கள் இருந்தன. மேற்பகுதியில் இருந்து கீழ்ப்பகுதி 10.4 மீட்டர் நீளமானது. படிக்கட்டின் ஊடாக அடியினை அடைந்ததும் நீருள் இருப்பதினைக் கண்ணாடியினூடாகக் காணக்கூடியதாக இருந்தது. நீர்த்தாவரங்கள், நீர் உயிரனங்களைப் பார்த்தேன்.

நியூசிலாந்து 27 - மில்வேட் சவுண்ட்(Milford Sound) கப்பல் பயணத்தில் பார்த்த அழகிய இயற்கைக் காட்சிகள்

2010-10-05T21:29:00.000-07:00

தொடர்ந்து மில்வேட் சவுண்டில் கப்பலில் பயணிக்கும் போது எனது புகைப்படக் கருவியினால் எடுக்கப்பட்ட புகைப்படங்கள்.

Anita bay, Dale point பகுதியில் கடலுடன்(Tasman Sea) நீர் சங்கமிப்பதைக் கீழே உள்ள படத்தில் காணலாம்.

நியூசிலாந்துப் பயணத்தில் சில முக்கிய பயணங்களின் போது சுற்றுலாப் பயணிகளைத் தனித்தனியே அல்லது அவர்களுடன் வந்தவர்களோடு சேர்ந்து புகைப்படம் எடுப்பார்கள். அப்பயணம் முடிவடைந்து வரும் போது , காட்சிப்படுத்தப் பட்டிருக்கும் அப்புகைப்படங்களை எங்களுக்குப் பிடித்தால் காசு குடுத்து வாங்கலாம். அப்படங்களுடன் அவர்களின் இணையத்தள முகவரியையும் தருவார்கள். அம்முகவரியில் நாங்கள் பிரயாணம் செய்த நாளை தெரிவு செய்து, அந்நாளில் எடுக்கப்பட்ட புகைப்படங்களைப் பார்ப்பதன் மூலம் எங்களது படங்களையும் தேடி எடுக்கலாம் அல்லது புகைப்படத்தின் இலக்கத்தின் மூலம் இலகுவாகப் புகைப்படத்தை இணையத்தில் இருந்து பெறலாம். நான் ஏற்கனவே விபரித்த குயின்ஸ்டவுனில் பிரயாணித்த இரு வேகப் படகுப் பயணத்தின் போது எடுக்கப் பட்ட புகைப்படங்கள், குயின்ஸ்டவுன் gondolaவில் எடுக்கப்பட்ட படங்களை இவ்வாறே பணம் குடுத்துப் பெற்றேன்.

மில் வேட் சவுண்டில் கப்பலில் பிரயாணிக்கும் போது ஒரு சிறு வேகப்படகில் ஒருவர் எமது கப்பலை நோக்கி வேகமாக வந்தார். மில்வேட் சவுண்ட் கப்பலில் ஏறும் பொழுது எங்களை புகைப்படம் எடுத்தார்கள். அப்புகைப்படங்களின் பிரதிகளைத் தருவதற்காகவே அவர் வேகமாக எங்களை நோக்கி வந்தார். நான் கப்பலின் மேல் தட்டில் இருந்து, பிரயாணம் முடியும் வரை இயற்கைக்காட்சிகளை இரசிக்க விரும்புவதினால் கீழ்த்தட்டுக்கு செல்ல விரும்பவில்லை. பயணம் முடிவடைந்து புகைப்படத்தைக் கேட்டபோது, நான் உடனடியாக வராததினால் எனக்கு புகைப்படம் வாங்க விருப்பமில்லை என்று தாங்கள் திருப்பிக் கொடுத்து விட்டதாகவும், புகைப்படத்தை இணையத்தில் தேடிப்பார்த்து வாங்கும்படி சொன்னார்கள். சிட்னி வந்ததும் இணையத்தில் தேடி ஒருவாறு கண்டு பிடித்து அப்படத்தை கணனியில் பிரதி எடுத்தேன். இலவசமாக எடுக்கக் கூடியதாக இருந்தது. தேவையில்லாமல் காசு குடுத்து மற்றைய புகைப்படங்களை குயின்ஸ்டவுனில் வாங்கி விட்டேன்.

தொடர்ந்து மில்வேட் ஒலியில் கப்பலில் பிரயாணிக்கும் போது கடல்சிங்கங்களையும் (Sea Lion)கண்டேன்.

அழகிய நீர்வீழ்ச்சி

சில நிமிடப் பயண முடிவில் கப்பல், நீரினுள் இருப்பதைப் பார்க்கக்குடிய(underwater observatory ) இடத்தை அடைந்தது.

நியூசிலாந்து 26 - உலகப் புகழ் பெற்ற மில்வேட் சவுண்டில் கப்பல் பயணம் ஆரம்பம்

2010-09-29T23:21:00.000-07:00

'TripAdvisor' என்ற அமைப்பின் கணிப்பின் படி 2008ம் ஆண்டிற்கான உலகத்தில் சுற்றுலா செல்லும் இடங்களில் முதல் இடத்தைப் பிடித்த இடம் மில்வேட் சவுண்ட். நியூசிலாந்திற்குச் செல்லும் சுற்றுலாப் பயணிகள் அதிகளவு மில்வேட் சவுண்டுக்குத் தான் செல்கிறார்கள். பிரபலமான எழுத்தாளரும் கவிஞருமான 'Rudyard Kipling' அவர்கள் 8வது உலக அதிசயமாக மில்வேட் சவுண்டினைச் சொல்லியிருக்கிறார். இந்த உலகப் புகழ் பெற்ற மில்வேட் சவுண்டில் கப்பல் பயணம் செய்ய கப்பலில் ஏறச் சென்றேன்.
கப்பல் செல்லும் பாதையினைக் கீழே உள்ள படத்தில் காணலாம்.

Anita bay, Dale point பகுதியில் கடலுடன் நீர் சங்கமிக்கிறது.

மில்வேட் சவுண்டில் கப்பலில் ஏற முன்பு புகைப்படம் எடுத்தார்கள். விரும்பினால் பயண முடிவில் அப்படத்தைக் காசு கொடுத்து வாங்கலாம் என்று சொன்னார்கள். இயற்கைக்காட்சிகள் மிக்க மலைகளினால் சூழப்பட்ட நீர்ப்பரப்பில் கப்பல் பயணித்தது. நான் கப்பலின் மேல்தட்டில் இருந்து கொண்டே இயற்கை அழகினை இரசித்தேன். மலைகளில் இருந்து வரும் நீர்வீழ்ச்சிகளை பல இடங்களில் காணக்கூடியதாக இருந்தது. எங்களது பயணம் கிட்டத்தட்ட இரண்டு மணித்தியாலப் பயணமாக இருந்தது.

கீழே உள்ள படத்தில் சுற்றுலாப் பயணிகள் செல்லும் இன்னுமொரு கப்பல்

குளிரினால் உடல் நடுங்கியது. கப்பலின் 2வது தளத்தில் உணவகங்கள் இருந்தன. ஆனால் கப்பலின் மேல்த்தளத்தில் இருந்து மில்வேட் சவுண்டின் இயற்கை அழகினை இரசித்துக் கொண்டு இருந்ததினால் உணவகங்களுக்கு நான் செல்லவில்லை.

மலை உட்சியில் இருந்து கீழ் நோக்கிப் பாயும் நீர்வீழ்ச்சிகள்

நியூசிலாந்து 25 - ரி ஆனாவில் இருந்து மில்வேட் சவுண்ட் வரை

2010-09-23T22:43:00.000-07:00

நான் அதிகமாக 'Staralliance' விமானங்களில் பயணிப்பதினால் எனக்கு நியூசிலாந்துக்குப் பயணிக்க இலவச நுளைவுச்சீட்டு கிடைத்தது. 'Staralliance' விமானங்களில் நான் 'Singapore airlines'ல் தான் அங்கத்தவராக இருக்கிறேன். இதனால் அவர்கள் மூலமாகத்தான் நான் இலவச நுளைவுச்சீட்டினைப் பெற முடியும். பயணம் செய்ய முதல் 2 மாதத்துக்கு முன்பே அவர்களுடன் தொடர்பு கொண்டால் தான் விரும்பிய நேரத்தில் பயணிக்க இலவச விமானச் சீட்டுக்களைப் பெறமுடியும். தென் நியூசிலாந்த்துக்குப் பயணிக்க விரும்பியதினால் சிட்னியில் இருந்து கிறைஸ் சேர்ச்சுக்கு சென்று வர சிங்கப்பூர் எயார்லைன்ஸின் மூலம் தொடர்பு கொண்டேன். நான் விரும்பிய நாட்களில் நியூசிலாந்தில் 7 முழு நாட்கள் நிற்கவே எனக்கு நுளைவுச்சீட்டுக் கிடைத்தது. வொக்ஸ் கிளேசியரும். மில்வேட் சவுண்டும் பார்க்கவே அதிகம் விரும்பியதினால் அதற்கு ஏற்றவாறு விடுதிகளை முன்பதிவு செய்திருந்தேன். ஒவ்வொரு நாளும் கிட்டத்தட்ட 3 மணித்தியாலங்கள் பயணிப்பதற்கு ஏற்றவாறே விடுதிகளைத் தெரிவு செய்தேன். மில்வேட் சவுண்டில் நல்ல விடுதிகள் இல்லை. ரி- ஆனாவில் இருந்து கிட்டத்தட்ட 2 மணித்தியாலம் தூரத்தில் தான் மில்வேட் சவுண்ட் இருக்கிறது. ரி- ஆனாவில் இருந்து மில்வேட் சவுண்ட் சென்று திரும்பி வர 4 மணித்தியாலப் பிரயாணம் தேவை. 7ம் நாள் முடிவில் கிறைஸ் சேர்ச்சுக்கு செல்ல வேண்டும். ரி- ஆனாவில் இருந்து மில்வேட் சவுண்டுக்கு 4 மணித்தியாலம் சென்று வரவும், மேலும் 2 மணித்தியாலமும் 15 நிமிடங்களும் பயணித்து குயின்ஸ்டவுன் வரவும் அன்று 5ம் நாள் பயணிக்க மட்டும் 6 மணித்தியாலத்தையும் 15 நிமிடத்தையும் ஒதுக்கினேன்.

5ம் நாள் பயணம்.

ரி-ஆனாவில் இருந்து மில்வேட் சவுண்டுக்குச்செல்ல கிட்டத்தட்ட 2 மணித்தியாலம் பிரயாணிக்க வேண்டும்.

10 மணியளவில் மில்வேட் சவுண்டில் கப்பல் பயணம் செல்ல முன்பதிவினை 3ம் நாள் மாலை குயின்ஸ்டவுனில் உள்ள சுற்றுலாத் தகவல் மையத்தில் பதிந்திருந்ததினால், காலை 7மணியளவில் ரி-ஆனாவில் இருந்து வாகனத்தில் பிரயாணிக்க ஆரம்பித்தேன். ரி-ஆனாவில் உணவகங்கள் எல்லாம் அதிகாலையில் மூடப்பட்டிருந்தமையினால் மில்வேட் சவுண்டில்(Milford Sound) இருக்கும் உணவகங்களில் உண்ணலாம் என முடிவெடுத்தேன். எரிபொருள் நிலையம் ஒன்றும் மில்வேட் சவுண்டில் இல்லை ,ரி-ஆனாவில் தான் கடைசி எரிபொருள் நிலையம் இருக்கிறது . இதனால் எரிபொருள் நிலையத்தில் மகிழுந்துக்கு தேவையான பெற்றோலைப் பெற்றேன். எரிபொருள் நிலையத்தில் இருந்த விசுக்கோத்துக்கள் வாங்கி உண்டபின்பு மில்வேட் சவுண்டை நோக்கிப் பயணித்தேன்.

சுற்றுலாப்பயணிகள் பலர் மில்வேட் நடைப்பயணத்தில்( Milford Track) நடந்து செல்வார்கள்.

அதாவது இந்த மில்வேட் நடைப்பயணம் ரி-ஆனா ஏரியில் இருந்து ஆரம்பித்து மில்வேட் சவுண்டில் முடிவடையும். கரடு முரடான பாதையில் 53.5 கிலோமீற்றர்கள் நடக்க வேண்டும். சுற்றுலாப்பயணிகள் 3,4 நாட்களாக இயற்கைக்காட்சிகளைக் இரசித்துக்கொண்டு நடந்து முடிப்பார்கள். போகிற வழியில் இரவில் தங்கி விட்டு காலை எழுந்தபின்பு நடப்பார்கள். எனக்கு நேரம் கிடைக்காததினால் நான் வாகனத்தில் 2 மணித்தியாலம் சென்று மில்வேட் சவுண்டுக்கு சென்றேன். 53.5 கிலோமீற்றர் மகிழுந்தில் செல்ல 2 மணித்தியாலம் தேவைப்படுமா? என்று நீங்கள் யோசிக்கலாம். ஆனால் மில்வேட் நடைப்பயணம் செல்லும் பாதையில் மகிழுந்தில் பிரயாணிக்க முடியாது. வேறு பாதையில் செல்ல வேண்டும்.

ரி- ஆனாவில் இருந்து மில்வேட் சவுண்டை நோக்கிப் பயணிக்கும் போது எனது புகைப்படக் கருவியினால் எடுக்கப்பட்ட புகைப்படங்களினைக் கீழே இணைத்திருக்கிறேன்.

மலைகளிலும், புற்தரைகளிலும் பனிக்கட்டிகள் இருந்தன.

போகும் வழியில் உள்ள ஏரியில் அருகில் உள்ள மலையின் தலைகீழான விம்பத்தினைக் காணக்கூடியதாக இருந்தது.

பனி படிந்த மலைகளினை போகும் வழியில் அதிகளவில் கண்டேன்.

பாதை குகையினூடாகச் சென்றது.

குகைக்குள் வெளிச்சமில்லை.

சில நிமிடப் பயணங்களின் பின்பு

மில்வேட் சவுண்டை அடைந்ததும் காலை உணவினை(sandwich) அங்கிருந்த உணவகம் ஒன்றில் வாங்கி உண்டபின்பு கப்பலை நோக்கிச்சென்றேன்.

நியூசிலாந்து 24 - ரி ஆனா ஒளிரும் புழுக்களின் குகை(Te-anau Glow worm cave)

2010-09-13T20:54:00.001-07:00

ரி ஆனாவை(Te anau ) கிட்டத்தட்ட மாலை ஐந்து மணிக்கு அடைந்தேன். அருகில் இருக்கும் படகுத்துறைக்கு செல்ல அங்கே படகு ஒன்று காத்துக் கொண்டிருந்தது.

ஏற்கனவே குயின்ஸ்டவுனில் உள்ள சுற்றுலாத் தகவல் மையத்தில், ஒளிரும் புழுக்களின் குகைக்கான (Te-anau Glow worm cave) நுளைவுச்சீட்டினைப் பதிவு செய்து இருந்தேன். குயின்ஸ்டவுனில் நுளைவுச்சீட்டினைப் பெற முன்பு நான் இக்குகைக்குச் செல்ல நினைக்கவில்லை. சிட்னியில் இருந்து கிட்டத்தட்ட இரண்டரை மணித்தியாலப் பயணமுடிவில் வரும் Jenolan cavesக்குச் சென்றிருந்ததினால் ஒளிரும் புழுக்களின் குகைக்குச் செல்ல விரும்பவில்லை. ஆனால் ரி - ஆனாவில் நேரம் இருப்பதினால் குகைக்குச் முடிவு செய்தேன். ஒளிரும் புழுக்களின் குகைக்கான பிரயாணத்தில் முதலில் நாற்பத்தைந்து நிமிடங்கள் படகின் மூலம் Te Anau எரியின் ஒரு கரையில் இருந்து மறுகரைக்குச் செல்ல வேண்டும். படகின் மேல்தளத்தில் இருந்து கொண்டு ஏரியின் அழகினை இரசித்துக்கொண்டு பயணித்தேன். இப்படகில் கிட்டத்தட்ட ஐம்பதுக்கு மேற்பட்ட பயணிகள் என்னுடன் பயணித்தார்கள்.

மறு கரையினை அடைந்ததும் இயற்கைக்காட்சிகளைப் பார்த்தவாறு குகை இருக்கும் இடத்தை நோக்கி நடந்தோம்.

சில நிமிடங்களில் ஒரு மண்டபத்தை அடைந்தோம். எங்களை ஏழு,எட்டு குழுக்களாகப் பிரித்தார்கள். குகைக்குள் படகில் செல்ல வேண்டும். ஒரே நேரத்தில் இரண்டு படகுகள் தான் செல்வதினால், முதல் இரண்டு குழுக்களும் குகைக்குள் செல்ல, மற்றவர்களுடன் நானும் அம்மண்டபத்தில் இருந்தேன். அக்குகை பற்றியும்,அக்குகையில் உள்ள ஒளிரும் புழுக்களின் வரலாறுகள் பற்றியும் விளங்கப்படுத்தினார்கள். அம்மண்டபச் சுவற்றில் பல வரலாற்றுச் சம்பவங்கள் பதியப்பட்டிருந்தன.

நாங்கள் அவற்றைப் பார்வையிட்டோம். குடிப்பதற்கு தேனீரும், உண்பதற்கு விசுக்கோத்தும் தந்தார்கள். குகைக்குள் சென்றவர்கள் திரும்பிவர நான் இருந்த குழு குகைக்குள் சென்றது. குகைக்குள் புகைப்படம் எடுக்கக் கூடாது என்று அறிவித்திருந்தார்கள். புகைப்படம் எடுப்பதினால் அங்குள்ள ஒளிரும் புழுக்களின் தூக்கம் கலைந்து விடும் என்று சொன்னார்கள். நியூசிலாந்தில் ஒளிரும் புழுக்களின் தூக்கம் கலைந்து விடுவதினால் புகைப்படம் எடுக்கக்கூடாது என்று சொல்லுகிறார்கள். ஆனால் நான் பிறந்த மண்ணில் ????
குகைக்குள் புகைப்படம் எடுப்பது தடை செய்யப்பட்டதினால், இணையத்தில் இருந்து பெறப்பட்ட படங்களை இங்கு இணைத்திருக்கிறேன்.
நிலத்துக்கு அடியில் தான் குகை உள்ளது. கீழே செல்லப் படிகள் இருந்தன. குகைக்குள் மின்விளக்குகள் பொருத்தப்பட்டிருந்தன. மெலிசான வெளிச்சத்தில் இரும்புக் கைபிடிகளைப் பிடித்துக் கொண்டு படிகளின் ஊடாக நடந்து சென்றோம்.

ஒன்றிரண்டு ஒளிரும் புழுக்கள் குகையில் இருந்தன. சில இடங்கள் மிகவும் குறுகலாக இருந்தன. பாறைகள் தலையினை இடிக்க வாய்ப்புக்கள் இருந்ததினால் அவதானமாக குனிந்து நடந்து செல்ல வேண்டும் என்ற எச்சரிக்கை அறிவுப்புகள் அங்கே இருந்தன. சில நிமிடங்கள் நடந்தபின்பு, குகைக்குள் சிறு ஓடை இருப்பதினை அவதானித்தோம். ஒடையில் மிகச்சிறிய படகு ஒன்று இருந்தது. அதில் கவனமாக ஒவ்வொரு சுற்றுலாப் பயணிகளையும் கையைப் பிடித்து ஏற்றினார்கள்.

எல்லோரும் படகில் ஏறி அமர,படகு வெளிக்கிட்டது. இப்படகு இயங்குவதற்கு துடுப்புக்கள் உபயோகிக்கப்படவில்லை. குகையின் சுவர்களில் குறுக்கும் நெடுக்குமாக கயிறு கட்டப்பட்டிருந்தது. அதனைப்பிடித்தவாறு படகோட்டி படகை இழுக்க, படகு அசைந்து சென்றது.

குகைக்குள் அப்பகுதியில் மின்விளக்கு பொருத்தப்படவில்லை. மின்விளக்கு பொருத்தப்படாததினால், குகைக்குள் செல்ல செல்ல ஒரே இருளாக இருந்தது. சில ஒளிரும் புழுக்களை குகைகளின் சுவர்களில் காணக்ககூடியதாக இருந்தன. படகு சில நிமிடங்கள் சென்றதும், படகோட்டி இனிஒருவரும் கதைக்கவேண்டாம், அமைதியாக இருக்கும் படி சொன்னார். எனென்றால் சில நிமிடங்கள் செல்ல, அதிகளவு ஒளிரும் புழுக்கள் இருக்கும் இடத்துக்கு படகு செல்லவுள்ளதினால், கதைப்பதினால் ஒளிரும் புழுக்களின் தூக்கம் கெட்டுவிடும். நாங்கள் அமைதியாக இருக்க, அதிகளவு ஒளிரும் புழுக்கள் இருக்கும் இடத்துக்குச் சென்றோம். குகையின் சுவர்களின் எல்லா இடங்களிலும் ஒளிரும் புழுக்கள் நிறைந்து காணப்பட்டன.

சில நிமிடங்களின் பின்பு மறுபடியும் படகின் மூலம் குகையினை விட்டு வெளியில் வந்தோம். பெரிய படகில் வந்த எல்லோரும் குகைக்குள் சென்று வந்த பின்பு, படகுத்துறையில் இருந்த படகில் மீண்டும் நாற்பத்தைந்து நிமிடப் பிரயாண முடிவில், ஆரம்பத்தில் படகு ஏறிய படகுத்துறை இடத்தை( Te-Anau)அடைந்தோம்.

ஒரு சீனா நாட்டு உணவகத்தில் அன்று இரவு உணவை உண்டபின்பு, அன்று இரவு தங்க வேண்டிய விடுதிக்கு சென்றேன்.

சிட்னியில் இருந்து குயின்ஸ்டவுன், மில்வெட் சவுண்ட் போன்ற இடங்களுக்குச் சென்ற எனக்குத் தெரிந்த பலர் ரி - ஆனாவில் உள்ள இக்குகைக்குச் செல்லவில்லை. புளுமவுண்டனில் உள்ள ஜெனோலான் குகைக்குச் சென்றதினால் செல்லவில்லை என்று சொன்னார்கள். ஆனால் Jenolan cavesல் படகுப்பயணம் இல்லை. ஒளிரும் புழுக்கள் இல்லை. அங்கு பார்ப்பது வேறு. இங்கு பார்ப்பது வேறு. கட்டாயம் செல்ல வேண்டிய இடங்களில் ஒன்று Te-anau Glow worm cave.

நியூசிலாந்து 23 - குயின்ஸ்டவுனில் இருந்து ரி ஆனா வரை

2010-09-08T23:22:00.001-07:00

குயின்ஸ்டவுனில் இருந்து கிட்டத்தட்ட 2 மணித்தியாலமும் 15 நிமிடங்களும் பயணித்தால் ரி ஆனாவுக்குச் செல்லலாம். மதிய உணவை முடித்ததும் ரி ஆனாவை நோக்கிப் பிரயாணித்தேன்.

போகும் போது எனது புகைப்படக்கருவியினால் எடுக்கப்பட்ட புகைப்படங்களை கீழே காணலாம். ஏரி, மலைகள் உட்பட அழகிய இயற்கைக் காட்சிகளை இரசித்துக் கொண்டு பயணித்தேன்.

நியூசிலாந்து 22- படகுப் பயணம்(Shot over jet)

2010-09-06T22:33:00.001-07:00

'Kawarau Jet' படகுப் பயணம் முடிந்ததும், ஏரியின் அடியில் சுற்றிவர கண்ணாடியினால் அமைக்கப்பட்ட அறைக்கு கூட்டிச் சென்றார்கள். அவ்வறையில் இருந்து ஏரியினுள் தெரியும் மீன்கள், கடல் வளங்களைப் பார்க்கலாம்.

அன்று மாலை 5 மணியளவில் ரி ஆனா குகைக்கு செல்வதற்கு பதிவு செய்திருந்தேன். குயின்ஸ்டவுனில் இருந்து கிட்டத்தட்ட 2 மணித்தியாலமும் 15 நிமிடங்களும் பயணம் செய்தால் ரி ஆனா வரும். 'Kawarau Jet' படகுப் பயணம் முடிய காலை 10.30 மணியாகி விட்டது. நேரம் இருப்பதினால் 'shot over jet' என்ற படகில் பிரயாணிக்கலாம் என முடிவு செய்தேன். அவுஸ்திரேலியாத் தொலைக்காட்சிகளில் சுற்றுலா பற்றிய நிகழ்ச்சிகளில் நியூசிலாந்து குயின்ஸ்டவுனில் சுற்றுலா பற்றிக் காண்பிக்கும் போது பெரும்பாலும் 'ஷொட் ஒவெர் ஜெட்' என்ற வேகப் படகினைக் காட்டுவார்கள். 2003ல் நடைபெற்ற உலகக்கிண்ண துடுப்பாட்டப் போட்டி பற்றி 'Fox Sports' தொலைக்காட்சி விளம்பரத்தில் அந்தத்துடுப்பாட்டப் போட்டியில் பங்குபெறும் நாடான நியூசிலாந்தின் பெயரைச் சொல்லி 'ஷொட் ஒவெர் ஜெட்' படகில் பயணிப்பதைக் காட்டினார்கள். நான் சென்ற Kawarau Jet படகை விட shot over jet படகில் பிரயாணம் செய்வது நன்றாக இருக்கும் என நான் தங்கியிருந்த விடுதியில் வேலை செய்பவர் சொல்லியிருந்தார். இதனால் ஷொட் ஒவெர் ஜெட் படகு இருக்கும் இடத்துக்கு சென்றேன்.நல்ல காலம் படகில் பயணிக்கத் தேவையான நுளைவுச்சீட்டும் உடனே கிடைக்கக்கூடியதாக இருந்தது. இப்படகு வேறு ஒரு ஏரியில் பிரயாணிக்கிறது. பாறைகளுக்கிடையிலான குறுகிய இடைவெளியில் இப்படகு வேகமாகச் செல்லும். பாறைகளுடன் மோதுவது போல வேகமாக பாறையினை நோக்கி சென்று பாறைக்கு கிட்ட படகு வந்தவுடன், படகோட்டி வேகமாக படகைத்திருப்பி பாறையுடன் மோதாமல் செய்வார். 'Shot over jet' படகுப் பயணத்தில் சிவப்பு நிற நீர்புக முடியாத மேலாடைகள் அணிந்து பிரயாணித்தோம்.

கீழே உள்ள படத்தில் தெரியும் மிகவும் ஒடுக்கமான இடைவெளிகள் உள்ள பாறைகளுக்கிடையில் வேகமாக படகு பிரயாணிக்கும்.

கீழே உள்ள படங்களில் நானும் இருக்கிறேன். பயணிக்கும் போது புகைப் படம் எடுத்தார்கள். பயண முடிவில் சுற்றுலாப் பயணிகள் இப்படங்களை வாங்க விரும்பினால் காசு கொடுத்து வாங்கலாம்.

இரண்டு படகுப்பயணங்களிலும் என்னை அதிகம் கவர்ந்தது 'shot over jet'. படகு வெளிக்கிடும் இடத்தில் உள்ள சிறிய தேனீர் கடையில் மதிய உணவை உண்டபின்பு ரி ஆனாவை நோக்கிப் பிரயாணித்தேன்.

நியூசிலாந்து 21- Kawarau Jetல் படகுப்பயணம்

2010-08-25T20:41:00.001-07:00

4ம் நாள் பயணம்
எனது பயணத்தின் போது தங்கியிருந்த விடுதிகளில் காலை உணவினை உண்பதற்கு மேலதிகமாக 10 - 20 நியூசிலாந்து வெள்ளிகள் கொடுக்கவேண்டும். அப்பணத்தினை விட குறைந்த பணத்துக்கு வெளியில் உள்ள உணவகங்களில் சுவையான உணவுகளை உண்ணலாம் என்பதினால் காலை உணவினை பயணத்தின் போது வெளியில் உள்ள உணவகங்களில் உண்டேன். ஆனால் நான் தங்கியிருந்த குயின்ஸ்டவுன் விடுதியில் தங்குமிட வாடகையுடன் காலை உணவினையும் தந்தார்கள்(அதாவது காலை உணவு இலவசம்). காலை உணவினை விடுதியில் உண்டபின்பு( இதே விடுதியில் தான் நான் 5ம் நாள் பயணமுடிவில் தங்கினேன்)Kawarau Jet என்ற வேகமாகச் செல்லும் படகில் செல்லும் இடத்துக்கு புறப்பட்டேன். இதற்கான நுளைவுச்சீட்டினை ஏற்கனவே 3ம் நாள் இரவு குயின்ஸ்டவுனில் உள்ள சுற்றுலா தகவல் மையத்தில் வாங்கியிருந்தேன். சென்ற பதிவில் சொல்லியிருந்தேன்.

மேலே உள்ள படம் விடுதியில் இருந்து படகு வெளிக்கிடும் இடத்துக்கு செல்லும் போது எடுக்கப்பட்டது.

சிட்னியில் இருக்கும் போது, குயின்ஸ்டவுனில் சென்றால் Shotover Jet என்ற வேகப்படகில் செல்லத்தான் விரும்பியிருந்தேன். பல்வேறு விளம்பரங்களில், காணொளிகளில் இப்படகுப் பயணம் பற்றிச் சொல்லி இருந்தார்கள். ஆனால் குயின்ஸ்டவுனில் நான் சென்ற சுற்றுலா தகவல் மையத்தைச் சேர்ந்தவர்கள், Kawarau Jet படகுப்பயணம் நன்றாக இருக்கும். Shotover Jet விட நீண்ட தூரமும், அதிக நிமிடங்களும் Kawarau Jetல் பயணிக்கலாம். அத்துடன் Kawarau Jet படகில் பிராயணித்து முடிந்ததும், கடலின் அடியில் சுற்றிவர கண்ணாடியினால் அமைக்கப்பட்ட அறைக்கு கூட்டிச் செல்வார்கள். அவ்வறையில் இருந்து கடலினுள் தெரியும் மீன்கள், கடல் வளங்களைப் பார்க்கலாம். அத்துடன் இரு படகுப்பயணச்சீட்டின் விலைகளில் Kawarau Jetவின் விலைதான் குறைவு என்றும் சொன்னார்கள். இதனால் தான் நான் Kawarau Jetனைத் தெரிவு செய்தேன். ஆனால் Kawarau Jet படகில் செல்வதினை விட Shotover Jet படகில் செல்வது தான் நன்றாக இருக்கும் என்று நான் தங்கியிருந்த குயின்ஸ்டவுன் விடுதியில் வேலை செய்பவர்களில் ஒருவர் சொன்னார்.

படகு வெளிக்கிடும் இடத்துக்கு சென்ற போது நேரம் கிட்டத்தட்ட காலை 8 மணியாக இருந்தது. காலை 9மணிக்கு Kawarau Jetல் பயணிக்க முன்பதிவு செய்ததினால்,நேரம் இருப்பதினால் அருகில் இருக்கும் குயின்ஸ்டவுனில் உள்ள கடைகள் இருக்கிற இடங்களுக்குச் சென்று வரத்தீர்மானித்தேன்.

9மணிக்கு முன்பாகவே படகுப் பிரயாணம் ஆரம்பிக்கும் இடத்துக்கு சென்றோம். நீர் உட்புகாத மேலாடையினை(Rain coats jacket)அணியத்தந்தார்கள். புகைப்படங்கள் எடுத்தார்கள். படகில் ஏறி அமர்ந்ததும் மறுபடியும் படங்கள் எடுத்தார்கள். கீழே உள்ள படகில் தான் நான் பிரயாணித்தேன். இப்படகில் நான் இருக்கிறேன். சிவப்பு நிற மேலாடை அணிந்தவர் தான் படகோட்டி.
படகுப்பயணம் முடிய விருப்பம் இருந்தால் படங்களைக் காசு கொடுத்து சுற்றுலாப் பயணிகள் வாங்குவார்கள். சென்ற பதிவில் நான் பதிந்த, நான் சென்ற குயின்ஸ்டவுன் கொண்டலாவிலும் புகைப்படம் எடுத்தார்கள். பயண முடிவில் படங்களைப் பெற்றுக் கொண்டோம். நியூசிலாந்தில் பெரும்பாலான முக்கிய சுற்றுலாக்களில் சுற்றுலாப் பயணிகளை இப்படிப் படம் பிடிப்பார்கள்.
படகில் செல்லச்செல்ல பயங்கர குளிராக இருந்தது. நீர் உட்புகாத ஆடை அணிந்திருந்தாலும் வேகமாகச் செல்லச் செல்ல ஏரி நீர் முகத்தில் அடிக்க முகம் குளிராக இருந்தது. அத்துடன் கைகளினால் படகின் கம்பியினைப் பிடிக்கும் போது குளிரினால் கை விரைக்கத் தொடங்கியது. நான் 2005 செப்டம்பர் மாதம் இறுதிக் கிழமைகளில் இந்த நியூசிலாந்துப் பயணத்தை மேற்கொண்டேன். அவ்வருடத்தில் அக்டோபர் மாதம் 1 ம்திகதி தான் கோடைகால நேரமாற்றம் செய்திருந்தார்கள். வேகமாகச் சென்ற படகு 180 பாகையில் வேகமாக திரும்பி பிரயாணித்தது.

கிட்டத்தட்ட ஒரு மணித்தியாலம் படகு வேகமாக மலைகளின் அருகிலும், செடி, கொடிகளின் கீழாகவும் பிரயாணித்தது.

நியூசிலாந்து 20- மெளரி(Maori) நடனம்

2010-08-23T22:46:00.001-07:00

2005ம் ஆண்டில் நான் சென்ற இந்த நியூசிலாந்து சுற்றுலாவில் 7 நாட்களுக்குள் முக்கியமாக வொக்ஸ்கிளேசியரையும், மில்வேட் ஒலியையும் பார்ப்பதற்காகவே எனது பயண ஒழுங்குகளை அமைத்திருந்தேன். இதனால் தான் 3ம் நாள் அன்று வொக்ஸ்கிளேசியரில் இருந்து வெளிக்கிட்டு குயின்ஸ்டவுனை அடைய நான்கரை மணித்தியாலம் பயணம் செய்தேன். 5ம் நாளில் மில்வோட் ஒலியைப் பார்ப்பதாக முடிவு செய்திருந்தேன். 4ம் நாளில் குயின்ஸ்டவுனில் வேகப் படகில் பயணம், Queenstown gondolaக்கும் செல்ல நினைத்திருந்தேன். இரவு ரி ஆனாவில் தங்க முடிவு செய்திருந்தேன். குயின்ஸ்டவுனை(Queenstown) அடையும் போது கிட்டத்தட்ட மாலை 6 மணியாகிவிட்டது. குயின்ஸ்டவுனில் நான் தங்கியிருந்த விடுதியிற்கு செல்லும் பாதை அறிய, குயின்ஸ்டவுன் வரைபடம் பெற அருகில் இருந்த சுற்றுலா தகவல் மையத்துக்கு சென்றேன்.1ம், 2ம் நாட்களில் இரவு தங்கியிருந்த கொகிரிகா, வொக்ஸ் கிளேசியரில் 6 மணிக்குப் பிறகு பார்ப்பதற்குப் பெரிதாக ஒன்றும் இருக்கவில்லை. ஆனால் குயின்ஸ்டவுனில் அன்று இரவு குயின்ஸ்டவுன் cable car -gondolaக்கு செல்லலாம். அங்கே மெளரி நடனம் பார்க்க முடியும் என்று சுற்றுலா தகவல் மையத்தில் சொன்னார்கள். அன்று cable car -gondolaக்கு செல்வதற்கும், மறுநாள் (4ம் நாள்) குயின்ஸ்டவுனில் வேகப் படகில் பயணிப்பதற்கும், 4ம் நாள் இரவு செல்லும் ரி ஆனா குகைக்குக்கு செல்வதற்கும், 5ம் நாள் மில்வோட் ஒலியில் படகில் பயணிப்பதற்கும் நுளைவுச்சீட்டினை முன்பதிவு செய்தேன். விடுதிக்கு சென்று உடமைகளை வைத்தபின்பு குயுன்ஸ்டவுன் skyline க்கு சென்றேன். மலையின் அடியில் இருந்து மலை உச்சிக்கு கம்பிகையிற்றினால்( cable car -gondola) மேலே செல்லவேண்டும்.

மலை உச்சியைக்கு சென்றதும் உச்சியில் இருந்து குயின்ஸ்டவுனின் அழகை இரசித்தேன்.

மலை உச்சியில் உணவகமும், மலை ஊச்சியில் இருந்து கீழே செல்லும் பாதையில் சறுக்கிக் கொண்டு செல்லும் விளையாடும் இடமும், நியூசிலாந்துப் பழங்குடியினர் ஆடும் ஆட்டம் நடைபெறும் இடமும் இருந்தன.

நியூசிலாந்துப் பழங்குடியினரை மெளரி(Maori)என்று அழைப்பார்கள்.அவர்களின் மொழிகளில் உரத்த குரலில் பாடி ஆடும் நடன நிகழ்வினை இங்கு காணலாம்.

இங்கேயுள்ள மெளரி மக்களது கடவுளின் சிலையினை கீழே இணைந்திருக்கின்ற படத்தில் காணலாம்.

மலை உச்சியில் இருந்து இறங்கிய பின்பு இரவு குயின்ஸ்டவுனில் உள்ள உணவகங்களுக்கு சென்று பார்த்தேன். பெரும்பாலான உணவகங்களில் மக்கள் நிரம்பி வழிந்து கொண்டிருந்தார்கள். தாய்லாந்து உணவகம் ஒன்றுக்கு சென்றேன். அங்கும் மக்கள் நிரம்பி வழிந்து சிலர் வரிசையில் இடம் கிடைக்கும் வரை நின்றார்கள். நானும் இடம்கிடைக்கும் வரை வரிசையில் நின்று 10,15 நிமிடங்களின் பின்பு எனக்கு இடம் கிடைத்தது. உணவை உண்டதும் அன்று இரவு தங்கும் விடுதிக்கு சென்றேன். விடுதி ஏரிக்கரையின் அருகில் இருந்தது.

நியூசிலாந்து 19- வானகாவில் இருந்து குயின்ஸ்டவுன் வரை

2010-08-19T22:23:00.000-07:00

நேரம் செல்லச் செல்ல முடிவில்லாமல் பாதை மேலே போய்க் கொண்டிருந்தது. நேரமும் மாலை 4 மணியாகி விட, இனி மேலே சென்றால் இருளில் தான் திரும்பி வர வேண்டும். இரவுப் பயணம் ஆபத்தானது. இருளமுதல் குயின்ஸ்டவுன் செல்ல வேண்டும் என்பதினால் திரும்பி போக முடிவெடுத்தேன். ஆனால் திரும்பிச் செல்ல வாகனத்தைத் திருப்புவதற்கு சிறிய இடமே இருந்தது. அப்படி திருப்பும்போது மறைவில் இருந்து வேறு வாகனங்கள் வந்தால் இடிபடும் அபாயமும் இருப்பதினால், நன்றாகத் திருப்பக்கூடிய இடம் வரை மேலே வாகனத்தில் பயணித்தேன். கொஞ்சம் கவனக்குறைவாக வாகனத்தினை ஓட்டினால் மலையில் இருந்து உருண்டு விழக்கூடிய அபாயமும் இருக்கிறது. சில நிமிடப் பயணங்களில் பாதையின் அருகில் உலங்கு வானூர்தி வந்து இறங்கி மேலே செல்லக்கூடிய ஒரு இடம் இருந்தது. அங்கே வாகனத்தைத் திருப்பக்கூடியதாக இருந்தது.

ஒருவாறு மலையின் அடிவாரத்துக்கு வந்து குயின்ஸ்டவுன் நோக்கி பிரயாணித்தேன். பிரயாணிக்கும் பாதையும் குன்றுகள், மலைகளின் ஊடாக வளைந்து வளைந்து செல்லும் வீதியாகவே இருந்தது. மிகவும் அவதானமாகப் பயணித்தோம்.

சில நிமிடப்பயணங்களின் முடிவில் தூரத்தில் கட்டிடங்கள் தெரிவது அவதானிக்கக்கூடியதாக இருந்தது. மலைப்பிரதேசத்தில் இருந்து பிரயாணிக்கும் போது தூரத் தெரியும் கட்டிடங்கள் உள்ள பகுதிதான் குயின்ஸ்டவுன்.

மலையில் இருந்து பாக்கும் போது தெரிந்த குயின்ஸ்டவுன், மலையை விட்டு இறங்கியதும் தெரியவில்லை.

குயின்ஸ்டவுனை நோக்கிப் பிரயாணிக்க மேலும் 20 நிமிடங்கள் தேவைப்பட்டது. குயின்ஸ்டவுனை அடைய மாலை 6 மணியாகிவிட்டது. குயின்ஸ்டவுனில் தான் கிறைஸ்சேர்ச்சை விட்டு வெளிக்கிட்டபின்பு அதிகளவு கட்டிடங்கள், வாகனங்கள், மனிதர்களைக் காணக்கூடியதாக இருந்தது. மற்றைய இடங்கள் இரவு ஊரடங்குச் சட்டம் அமுலில் இருக்கும் இடங்களைப் போல அமைதியாகவே இருந்தன. ஆனால் குயின்ஸ்டவுனில் கடைகளும், உணவகங்களும் இரவு நேரத்திலும் திறந்து திருவிழா போலக் காட்சியளித்தன. கிரைஸ்சேர்ச்சசை விட்டு வெளிக்கிட்டபின்பு கிறைஸ்சேர்சுக்கு அடுத்தபடியாக அதிக வீதிகளை குயின்ஸ்டவுனில் தான் நான் பார்த்தேன். படத்தில் இருப்பது குயின்ஸ்டவுனின் வரைபடம்.

குயின்ஸ்டவுனைவிட மற்றைய இடங்கள் மிகவும் சிறியவை.கிறைஸ்சேர்ச் தான் மிகவும் பெரியது.

நியூசிலாந்து 18- வானகா(Wanaka)

2010-08-18T22:02:00.000-07:00

'Puzzling World'ல் இருந்து வெளிக்கிடும் போது மதியம் 2 மணியாகிவிட்டது.அன்று காலையில் உணவினை ஒழுங்காக உண்ணாத காரணத்தினாலும்,Puzzling World ற்கு சென்று மாயத்தோற்றங்களைப் பார்த்ததினால் தலை சுற்றியதினாலும் தலையிடி ஏற்பட்டது. சில நிமிடப் பயணங்களில் வானகா நகரப்பகுதியை அடைந்தேன்.கிறைஸ் சேர்ச்சில் இருந்து(Christchurch) முதல் நாள் வெளிக்கிட்ட பின்பு, இங்கு தான் அதிக மக்களையும், கடைகளையும் கண்டேன். வீதியின் ஒரு பக்கத்தில் ஏரியும், மறுபக்கத்தில் கடைகளும் இருக்கின்றன.

சுற்றுலாப் பயணிகள் சிலர் குளிர்காலங்களில் வானகா, குயின்ஸ்டவுண் ஆகிய இடங்களுக்கு பனிக்கட்டிகளில் விளையாட விரும்பிச் செல்வார்கள். பனி படர்ந்த மலைகளில் பனிகளில் சறுக்கிக் கொண்டு விளையாடுவார்கள்(Skiing). அத்துடன் மலை உச்சியில் அமைக்கப்பட்ட Chair liftலும் விரும்பிச்செல்வார்கள்.

மதிய உணவை உண்டதும் அருகில் உள்ள ஏரிப்பக்கம் நடக்க நினைத்தேன்.அப்பொழுது நேரம் கிட்டத்தட்ட மணி 3 இருக்கும். இன்னும் 1 மணித்தியாலமும் 15 நிமிடங்களும் பயணித்தால் அன்று இரவு தங்கவேண்டிய் குயின்ஸ்டவுன் வந்துவிடும்.அத்துடன் அருகில் இருக்கும் பனிமலையில் உள்ள உயரச் செல்லும் கதிரைகளில்(Chair lift) சென்று வரவிரும்பினேன். மலைகள், ஏரிகள் உள்ள இப்பிரதேசங்களில் இருள முன்பு பயணிப்பது நல்லது என்பதினால் ஏரியின் அருகில் நடக்கவிரும்பவில்லை. குயின்ஸ்டவுனுக்கு வானகாவில் இருந்து செல்வதற்கு 2 வீதிகள் இருக்கிறன. ஒன்று பிரதான வீதி. மற்றைய வீதியினால் சென்றால் தான் உயரச் செல்லும் கதிரை(Chair lift) இருக்கும் இடம் வரும். அதனால் இரண்டாவதுவழியைத்தீர்மானித்தேன். அவ்வீதி பிரதான வீதியல்ல.

போகும் போது வலது பக்கத்தில் தெரிந்த மலைப்பகுதியில் தான் உயரச் செல்லும் கதிரை இருப்பதாக வீதி அறிவுறுத்தலில் சொல்லப்பட்டதினால் வலதுபக்கத்திற்கு செல்லும் வீதியில் எமது வாகனத்தை திருப்பினோம். மலையைச்சுற்றிச் சுற்றி பாதைகள் பாதைகள் இருந்தன. அப்பாதையும் புளுதி படிந்த தார் பூசப்படாத வீதியாகக் காணப்பட்டது.மலையைச்சுற்றிச் சுற்றி வாகனம் மேலே ஏறிப் பயணித்தது. பாதுகாப்பற்ற வீதியாக இருந்ததினால் மிகவும் கவனமாகச் செல்லவேண்டும்.

நேரம் செல்ல,செல்ல, முடிவில்லாமல் பாதை மேலே போய்க் கொண்டிருந்தது. நேரமும் மாலை 4 மணியாகி விட்டது.

நியூசிலாந்து 17 -Puzzling World (குழப்பமான உலகம்)

2010-08-16T22:18:00.000-07:00

அழகிய ஏரிகளை இரசித்துக் கொண்டு கிட்டத்தட்ட மதியம் ஒரு மணியளவில் வானகாவினை அடைந்தோம். வீதியில் அருகில் இருந்தது Puzzling World(குழப்பமான உலகம்).அங்கே சில கட்டிடங்கள் விழுவது போல சரிந்த நிலையில் காணப்பட்டன.
.
சிட்னியில் இருந்து நியூசிலாந்துக்கு செல்லும்வரை Puzzling World பற்றி நான் அறிந்திருக்கவில்லை. நியூசிலாந்தில் சுற்றுலா வழிகாட்டும் நூல்களில் Puzzling World பற்றிய தகவல்கள் இருந்தன. பிரயாணிக்கும் வீதியின் அருகில் Puzzling World இருப்பதினாலும், நேரமும் இருந்ததினாலும், மாயத்தோற்றத்தில் (Illusion)அமைக்கப்பட்டுள்ள பல விடயங்களை உள்ள Puzzling Worldக்கு சென்று பார்க்கலாம் என முடிவு செய்தேன்.

மேலே படத்தில் காணப்படும் கட்டடம் The Leaning Tower of Wanaka என்று அழைக்கப்படுகிறது. 53 பாகை சரிவில் அமைக்கப்பட்டிருக்கிறது.

Puzzling Worldக்கு செல்ல மாயத்தோற்றங்கள் உள்ள அறைகளுக்கும் , Maze(சுற்றிச் சுற்றிச் செல்லும் சிக்கலான வழி)க்கும் செல்ல தனித்தனிக் கட்டணம் செலுத்த வேண்டும். இரண்டுக்கும் சேர்த்து கட்டணம் வாங்கினால் நுளைவுச்சீட்டுப் பணத்தில் சில தள்ளுபடிகள் உள்ளன. மெல்பேர்னுக்கு கிட்ட Arthurs Seat என்ற இடம் இருக்கிறது.அங்கே உள்ள Mazeக்கு 2003ம் ஆண்டு சென்றிருக்கிறேன். என்னுடன் அங்கு வந்தவருக்கு தெரியாமல் அந்த Mazeல் ஒளிக்கப் போய் திரும்பிவர பாதை தெரியாமல் கஸ்டப்பட்டுவிட்டேன். இங்கேயும் இந்த Mazeக்கு சென்று திரும்பிவரத் தெரியாமல் நேரம் செல்லவாய்ப்பிருக்கிறது. அன்று இரவு குயின்ஸ்டவுனில் உள்ள விடுதியில் தங்குவதற்கு முன்பதிவு பதிந்திருந்தேன். குயின்ஸ்டவுனுக்குச் செல்ல அன்று சில மணித்தியாலப் பயணங்கள் இருப்பதினால் நான் இந்த Mazeக்கு செல்லவில்லை. இதனால் மாயத்தோற்றங்கள் உள்ள அறைகளுக்கு செல்ல மட்டுமே நுளைவுச்சீட்டினை வாங்கினேன்.

ஒரு அறையில் பிரபல்யமானவர்களின் மாதிரி உருவங்கள் காணப்பட்டன.அறை முழுவதும் காணப்பட்ட 168 முகங்களும் எங்களைப் பார்ப்பதுபோல அமைக்கப்பட்டிருந்தன. அம்முகங்களில், மேற்கத்தைய நாடுகள் தங்களது சுயநலத்துக்காக ஆரம்பத்தில் பயங்கரவாதியாகச் சித்தரித்து, பிற்காலத்தில் எல்லோராலும் போற்றப்பட்ட நெல்சன் மண்டேலாவின் முகங்களும் இருந்தன.

வேறு ஒரு அறைக்கு சென்றால் கீழே நான் இணைத்த படத்தில் தெரிவது போல அறையின் இடதுபக்கத்தில் இருந்து அறையின் வலதுபக்கத்துக்கு செல்லும் போது இடதுபக்கத்தில் நிற்கும் போது உயரமாகத் தோற்றமளித்தவர் தற்பொழுது உயரம்குறைந்தவர் போல தோற்றமளிப்பார். அவ்வாறே வலதுபக்கத்தில் இருப்பவர் இடதுபக்கத்துக்கு செல்லும்போது உயரம் குறைந்தவராக இருப்பவர் உயரம் கூடியவராகத் தோற்றமளிப்பார். இந்த மாயத்தோற்ற தொழில் நுட்பம், நியூசிலாந்தில் படம் பிடிக்கப்பட்ட உலகப் புகழ்பெற்ற 'The Lord of the Rings' என்ற திரைப்படத்தில் உபயோகிக்கப்பட்டது.

கீழே நான் இணைத்த படங்களில் உள்ள அறை 15 பாகை கோணத்தில் சரிவாகக் கட்டப்பட்டுள்ளது. அறையின் உள்ளே இருப்பவை வழமைபோல அமைக்கப்பட்டிருந்தாலும், அறையின் உள்ளே செல்லும் போது விழுந்து விடுவோமோ என்ற எண்ணம் ஏற்படும்.

உரோமர் காலத்து மலசல கூடத்தினை கீழே உள்ள படத்தில் காணலாம். படத்தில் இருப்பவர்களில் சிலர் உண்மையான மனிதர்கள். சில சிலைகள்.

நியூசிலாந்து 16 -Hawea ஏரி

2010-08-12T18:11:00.000-07:00

காஸ்டில் இருந்து வானகாவை நோக்கிப் பயணிக்கும் போது வீதியின் வலதுபக்கத்தில் காணப்பட்ட நியூசிலாந்தின் 4வது பெரிய ஏரியான வானகாவின் அழகினை இரசித்துக் கொண்டு பயணித்தேன். கொஞ்சந்தூரம் செல்ல வீதியின் இடதுபக்கத்தில் Hawea ஏரியைக்கண்டேன்.

இரு ஏரிகளும் நான் இங்கு இணைத்த படங்களில் பார்ப்பதைவிட நேரில் சென்று பார்க்கும் போது பல மடங்கு அழகாகத் தெரியும்.2005ல் பயணித்தபோது என்னிடம் இருந்தது சாதாரண புகைப்படக்கருவி(2 megapixel camera).பயணத்தின் போது இடை இடையே மழை தூறிக்கொண்டிருந்தது.

நியூசிலாந்து 15 -வானகா ஏரி( Wanaka Lake)

2010-08-11T00:07:00.001-07:00

காஸ்ட் வீதிகளில் மக்களும் வாகனங்களும் மிக மிகக்குறைவாகக் காணப்பட்டன.நான் காஸ்டுக்கு சென்ற போது, விடுதியுடன் சேர்ந்த ஒரே ஒரு உணவகம் மட்டும் அங்கே இருந்தது. ஆனால் காலை 11 மணிக்கு அவ்வூணவகம் முடப்பட்டிருந்தது. மணிக்குப் பிறகு தான் அவ்வுணவகத்தைத் திறப்பார்கள் என்று அறிந்தேன்.அதனால் அங்கே உள்ள ஒரே ஒரு எரிபொருள் நிலையத்தில் இருந்து விசுக்கோத்துக்களை வாங்கி உண்டு விட்டு,எரிபொருள் நிலையத்தில் வாகனத்திற்கு தேவையான எரிபொருளை பெற்றுக் கொண்டு வானகா(Wanaka) நோக்கி பயணித்தேன்.பொதுவாக முக்கிய பிரதான நகரங்களை விட மற்றைய நகரங்களில் பெற்றோலின் விலை அதிகம்.காஸ்டிலும் பெற்றோலின் விலை மிக அதிகமாக இருந்தது.காஸ்ட்டில் பார்ப்பதற்கு பெரிதாக ஒன்றும் இல்லை. என்னுடன் வேலை பார்க்கும் அவுஸ்திரெலிய வெள்ளைக்காரர் ஒருவர் அண்மையில் நியூசிலாந்து நாட்டுக்கு சுற்றுலா சென்றார். அவர் காஸ்டில் ஒரு நாள் இரவில் தங்கியதாகவும், அந்த நகரில் அன்று பொழுது போக்குவதற்கு ஒன்றுமில்லாதினால் வெறுத்துப் போனதாகவும், நியூசிலாந்துப்பயணத்தில் தனக்குப்பிடிக்காத இடம் காஸ்ட் என்றும் சொன்னார். காஸ்டில் (Haast) இருந்து வானகா(Wanaka)வரை ஒன்றேமுக்கால் மணித்தியாலம் பிரயாணம் செல்லவேண்டும்.

இப்பிரயாணத்தில் மிகவும் அழகான மலைகளையும், ஏரிகளையும் பார்த்து இரசித்தேன்.

தொடர்ந்து பயணிக்கும் போது விதியின் அருகில் வானகா ஏரியினைக்( Wanaka Lake) காணலாம்.காஸ்டில் இருந்து வானகாவுக்கு செல்லும் போது வீதியின் வலதுபக்கத்தில் வானகா ஏரியினைக் காணலாம்.

நியூசிலாந்து 14 -வொக்ஸ் கிளேசியரில் இருந்து காஸ்ட்(Haast) வரை

2010-08-05T23:17:00.000-07:00

வொக்ஸ் கிளேசியர் அடிவாரம்வரை சென்று திரும்பும் போது, வீதியில் காணப்பட்ட சில அறிவிப்புக்களில் சில இடங்களில் இருந்து வொக்ஸ்கிளேசியரைப் பார்க்கலாம் என்று எழுதப்பட்டிருந்தது.அவ்விடங்களுக்கு வாகனத்தில் சென்று பார்த்தோம். தூரத்தில் தெரியும் மலை இடைவெளிக்குள்ளே கிளேசியர் தெரிந்தது.

வொக்ஸ் கிளேசியரின் பிரதான சந்தியில் இருந்து வாகனத்தில் சில நிமிடங்கள் சென்று பிறகு ஒற்றையடிப் பாதைகளினூடாக 20 நிமிடங்கள் நடந்து சென்றால் மதேசன்(Lake matheson) என்ற ஏரியைப் பார்க்கலாம்.

மேலும் 25 நிமிட நடைப்பயணத்தில் மதேசன் ஏரியில் வொக்ஸ் கிளேசியரின் அழகிய நிழலைக் காணலாம்.

அன்று இரவு தங்கிய விடுதியின் (Lake matheson Motel)புகைப்படம்

வொக்ஸ் கிளேசியரில் மதியம், இரவு உணவுகளை இரு வெவ்வேறு உணவகத்தில் உண்டேன். மொத்தமாக அங்கு 3,4 உணவகங்ளே உள்ளன. எல்லாம் ஆங்கில உணவகங்கள். உணவும் பெரிதாக உருசியாக இருக்கவில்லை.

3ம் நாள் பயணம்
3ம் நாள் இரவில் குயின்ஸ்டவுனில் தங்குவதற்கு குயின்ஸ்டவுனில் உள்ள விடுதியில் முன்பதிவு செய்திருந்தேன். வொக்ஸ்கிளேசியரில் இருந்து கிட்டத்தட்ட நாலரை மணித்தியாலம் பயணம் செய்தால் தான் குயின்ஸ்டவுனை அடையலாம்.போகிற வழியில் காஸ்ட்(Haast) என்ற நகரத்தினுடாகச் செல்லவேண்டும். காஸ்டுக்கு செல்ல வொக்ஸ் கிளேசியரில் இருந்து கிட்டத்தட்ட ஒன்ரரை மணித்தியாலம் பயணிக்க வேண்டும்.

வொக்ஸ் கிளேசியரில் இருந்த உணவகங்களில் உணவுகள் பிடிக்காத காரணத்தினால், போகும் வழியில் வரும் உணவகம் ஒன்றில் உண்ணலாம் என்று நினைத்து காலை உணவை உண்ணாமல் காஸ்ட்டை நோக்கிப் பயணித்தேன்.

மலைகள்,அழகிய கடற்கரைகள், கடலில் தெரியும் பாறைகள், குன்றுகள் என்பவற்றை பார்த்து இரசித்துக் கொண்டு பயணித்தேன்.

வீதியில் உணவகம் ஒன்றையும் காண முடியாமல் இருந்தது. தென் நியூசிலாந்தில் முக்கிய நகரங்களைத் தவிர வீதிகளில் உணவகங்களோ கடைகளோ காண முடியாது. வழியில் ஒரு இடத்தில் விதியில் இருந்து பார்க்கும் போது ஒரு ஒற்றையடிப்பாதையின் முடிவில் ஒரு வீட்டில் காலை உணவகம் காணக்கூடியதாக இருந்தாலும், அவ்விடத்தில் வேறு வீடுகள், வாகனங்களையும் காணமுடியாமல் இருந்ததினால் அவ்விடத்தில் உண்ணுவதைத் தவிர்த்தேன். தென் நியூசிலாந்தில் நான் பயணித்த முக்கிய சில நகரங்களைத்தவிர மற்றைய இடங்களில் மக்கள், வாகனங்கள் குறைவாகவே காணக்கூடியதாக இருந்தது. பொதுவாக தென் நியூசிலாந்து பயணத்தில் வீதிகளில் வாகனங்களை மிகவும் குறைவாகவே காணக்கூடியதாக இருந்தது. ஒவ்வொரு நகரத்தை இணைக்கும் வீதிகளும் பெரும்பாலும் ஒரே ஒரு வீதிகளாக இருந்தது. பெரும்பாலான வீதிகள் மலைத்தொடர், நீர் நிலைகளுக்கு இடையேதான் அமைந்திருந்தன.ஒன்ரரை மணித்தியாலப் பயண முடிவில் காலை 11 மணியளவில் காஸ்டை அடைந்தேன்.

நியூசிலாந்து 13 - வொக்ஸ்கிளேசியர் அடிவாரத்தை நோக்கி நடைப்பயணம்

2010-07-27T23:24:00.000-07:00

உலங்குவானூர்திப் பயணம் முடிவடைந்ததும் வொக்ஸ் கிளேசியர் அடிவாரம் வரை நடந்து செல்ல முடிவெடுத்தேன். வோக்ஸ்கிளேசியர் நகரத்தில் இருந்து வோக்ஸ்கிளேசியர் நடைப்பயணம் ஆரம்பிக்கும் இடமான வாகனத்தரிப்பிடத்துக்கு செல்ல 10 நிமிடங்கள் மகிழுந்தில் செல்லவேண்டும்.

பாறைகள், அருவிகள் நிறைந்த கரடு முரடான பாதைகளினூடாக நடந்து சென்றால் அடிவாரத்தினை அடையலாம்.சில இடங்களில் நடக்கும் போது கவனமாக நடக்க வேண்டும். கவனிக்காது விட்டால் விழக்கூடிய சந்தர்ப்பம் இருக்கிறது.
நடந்து செல்லும் போது பல இடங்களில் எழுதியிருந்த கிளேசியர் பற்றிய பல தகவல்களைக் கண்டேன். சில வருடங்களுக்கு முன்பு கிளேசியர் அந்த இடம் வரை இருந்ததாகவும் பிற்காலத்தில் அழிந்து பின்னோக்கிச் சென்றதாகவும் அத்தகவல்கள் மூலம் அறியக்கூடியதாக இருந்தது. 80ம் ஆண்டில் கிளேசியர் இருந்த இடத்தில் இருந்து 2005ல் நான் சென்ற போது கிளேசியர் உள்ள இடத்துக்கு நடந்து செல்ல 20 நிமிடங்களுக்கு மேல் எடுத்தது. அதாவது 25 வருடங்களில் கிளேசியரின் நீளம் குறைந்துள்ளதை அறியக்கூடியதாக இருந்தது.

அடிவாரத்துக்கு மிகவும் கிட்டச்செல்லக்கூடாது. உயிருக்கு ஆபத்தான இடம். பெரிய பனிக்கட்டிகள் விழவாய்ப்பிருக்கிறது. இதனால் அபாயம் என்ற அறிவுப்புப் பலகையை அங்கே வைத்திருக்கிறார்கள். சென்ற வருடம் மேற்கு அவுஸ்திரெலியாவைச் சேர்ந்த இந்தியர்கள் இருவர் அந்த அறிவுப்பலகையை அலட்சியம் செய்து அறிவுப்பலகைக்கு அப்பால் சென்றபோது பனிக்கட்டிகள் இவர்கள் மீது விழுந்ததினால் புதையுண்டு உயிரழந்தார்கள். இவர்களின் பெற்றோர்களின் முன்னால் இந்த அவலம் நடைபெற்றது.

அடிவாரத்திற்கு அப்பால் வழிகாட்டி ஒருவரின் உதவியுடன் கிலேசியரில் ஏறலாம். அதற்கு கட்டணமுண்டு. ஏறும் போது கிளேசியரில் வழுக்காமல் நடப்பதற்கு ஏற்ப பாதணிகள் அணிய வேண்டும். கொகிரிகாவில் சந்தித்த விடுதி உரிமையாளரின் ஆலோசனையினாலும் நேரப்பிரச்சனை காரணமாகவும் நான் கிளேசியரில் ஏறவில்லை என்று முன்பு உங்களுக்கு சொல்லியிருந்தேன். ஆனால் உலங்குவானூர்தியில் பயணித்து கிளேசியரில் நடந்தேன்.(ஏற்கனவே இப்பிரயாணம் பற்றி சென்ற பதிவில் சொல்லியிருந்தேன்). ஏற்கனவே வழிகாட்டி உதவியுடன் கிளேசியரில் ஏறி நடந்து முடிந்து திரும்பிக் கொண்டிருப்பவர்களை கீழே உள்ள படத்தில் நீங்கள் காணலாம். நான் அடிவாரத்தில் இருந்து எனது புகைப்படக்கருவியினால் இப்படத்தை எடுத்திருந்தேன்.

நியூசிலாந்து 12 -உலங்குவானூர்தியில் இருந்து நான் பார்த்த கிளேசியர்

2010-07-25T23:29:00.001-07:00

பயணத்தின் போது மலையின் ஒருபகுதியில் உலங்கு வானூர்தி வந்து இறங்கியது. மலையின் எல்லா இடங்களிலும் நடப்பது ஆபத்தைத் தரும். எனென்றால் நாங்கள் நடக்கும் போது பனிக்கட்டிக்குள் புதைந்துவிடக்கூடிய அபாயமும் இருக்கிறது. விமான ஓட்டி சொன்ன இடத்தில் நடந்து பார்த்தோம்.

செப்டம்பர் மாத இறுதிக் கிழமைகளில் தான் நான் நியூசிலாந்து சென்றேன். அக்காலத்தில் நியூசிலாந்தில் குளிர் அதிகம். அதுவும் மலைப் பிரதேசங்களில் என்பதினால் இன்னும் குளிர் கூடவாக இருக்கும். ஆனால் உலங்குவானூர்தியில் இருந்து மலையில் உச்சியில் இறக்கிய பகுதியில் சூரிய வெளிச்சம் காரணமாக குளிர் இருக்கவில்லை. உலங்குவானூர்திப் பயணத்தை பதிவு செய்யும் போது, மலை உச்சியில் இருக்கும் போது குளிர்ச்சியான கண்ணாடியை அணிந்து வந்தால் நல்லது என்று சொன்னார்கள். சூரியகதிர்கள் மலையில் உள்ள பனிக்கட்டியில் விழுந்து தெறிப்பதினால் கண்கள் சிலவேளை கூசும் என்றார்கள்.

நாங்கள் நடக்கும் போது இன்னுமொரு உலங்குவானூர்தியில் இருந்தும் பயணிகள் வந்தார்கள்.

சில நிமிடங்களின் பின்பு மீண்டும் மலை உச்சியில் இருந்து உலங்கு வானூர்தியில் எங்களது பயணம் ஆரம்பமாகியது.

பிரயாணத்தின் போது மவுண்ட் குக்கிற்கும்(Mount Cook) மேலாக உலங்குவானூர்தியில் பயணித்தோம். நியூசிலாந்தில் ஏன் பசுபிக் நாடுகளில் மிகவும் உயரமான மலை குக் மலை.
நாங்கள் பயணித்த உலங்குவானூர்தியில் விரான்ஸ் ஜோசப்பில் இருந்து ஏறியவர்களும் இருந்தை முந்தைய பதிவில் சொல்லியிருந்தேன்.அந்த இருவரையும் விரான்ஸ் ஜோசப்பில் இறக்கி விட, விரான்ஸ் ஜோசப்பை நோக்கி உலங்கு வானூர்தி பயணித்தது.

மேலே நான் இணைத்த புகைப்படத்தைப் பெரிதாகப் பார்க்கும் போது கிளேஸியரில் வெய்யில் ஊடுறுவும் போது அடியில் தெரியும் பச்சை கலந்த நீலத்தைக் காணலாம்.

சில நிமிடப் பயணங்களின் பின்பு விரான்ஸ் ஜோசப்பில் உலங்கு வானூர்தி தரையிறக்கத் தொடங்கியது.

சுற்றுலாப்பயணிகள் இருவரையும் இறக்கிவிட்டு மீண்டும் உலங்கு வானூர்தி விரான்ஸிச் ஜோசப்பில்(Franz Josef) இருந்து வொக்ஸ் கிளேசியர்(Fox Glacier) நோக்கி பயணித்தது. கீழே உள்ள படத்தில் மலைகளுக்கிடையில் வெள்ளையாகத் தெரிவது கிளேசியர்(Franz Josef Glacier).

தொடர்ந்து வொக்ஸ் கிளேசியரை அடையும் வரை வானிலிருந்து எடுக்கப்பட்ட புகைப்படங்கள்.

நியூசிலாந்து 11 - உலங்குவானூர்தியில் பயணம்

2010-07-15T23:57:00.000-07:00

உலங்குவானூர்தி பறந்து வந்து எங்களுக்கு முன்னால் சில தூரத்தில் நின்றது. உலங்குவானூர்தியில் இருக்கும் சுற்றும் காத்தாடிச் செட்டைகளினால் ஆபத்து என்பதினால் எங்களை உடனடியாக உலங்குவானூர்திக்கு கிட்டச் செல்ல வழிகாட்டி அனுமதிக்கவில்லை. சில நிமிடங்களின் பின்பு உலங்குவானூர்தியில் ஏற அனுமதித்தார்கள்.

வானூர்தியில் 6 இருக்கைகள் இருந்தன. விமானியுடன், இன்னுமொருவர் துணையாக இருந்தார். இருவரும் பயணத்தின் போது விளக்கங்கள் தருவதாகச் சொன்னார்கள். இவ்வானூர்தியில் பிரான்ஸ் ஜோசப்பில் இருந்து ஏறிய இருவர் இருந்தார்கள். நாங்களும் வானூர்தியில் ஏறியவுடன் வழிகாட்டி திரும்பிச் சென்று விட்டார். உலங்குவானூர்தி பறக்கத் துவங்கியது.

மலை அடிவாரத்தில் தெரியும் Glacier

Glacier க்கு மேலாகப் பறக்கும் போது பார்த்தவை

மலைகளுக்கு மேலாகப் பறக்கும் போது பார்த்த முகில்களும், மலையில் படிந்த பனிக்கட்டிகளும் Glacierயும் நான் இணைத்த புகைப்படங்களில் இருந்து காணலாம்.

நான் இங்கு புகைப்படத்தில் இணைத்தவற்றை விட நேரில் அழகாக இருந்தது. வேறு ஒரு உலகத்தில் இருந்தது போல ஒரு உணர்வு ஏற்பட்டது.

பயணத்தின் போது விமானியும், துணையாக வந்தவரும் நாங்கள் பார்த்த மலைகள், நீர் வீழ்ச்சிகள் பற்றிய விளக்கங்களைத் தந்தார்கள். தென் நியூசிலாந்தின் மேற்குப்பகுதியில் உள்ள பெரும்பாலான மலைகளையும் காண்பித்தார்கள். சில நிமிடப்பயணத்தின் போது மலை உச்சியின் ஒருபகுதியில் உலங்கு வானூர்தி வந்து இறங்கியது.

நியூசிலாந்து 10 - Fox Glacier (வொக்ஸ் கிளேசியர்)

2010-07-13T23:46:00.001-07:00

விரான்ஸ் ஜோசப்பில் நிற்காமல் தொடர்ந்து வொக்ஸ் கிளேசியரை நோக்கிப் பயணித்தேன்.

பிரான்ஸ் ஜோசப்பில் இருந்து கிட்டத்தட்ட 15 நிமிடப் பயணத்தில் வொக்ஸ் கிளேசியரை அடைந்தேன்.

Fox Glacierல் நான் உலங்கு வானூர்தியில் பறப்பது பற்றி முன்பே நான் நினைத்திருக்கவில்லை.ஆனால் நியூசிலாந்துப் பயணத்தின் 6 வது நாளில் Mount Cook (குக் மலை)என்ற இடத்தில் தான் உலங்கு வானூர்தியில் பறக்கவே விரும்பி இருந்தேன். வொக்ஸ் கிளேசியரில் வழிகாட்டியின் உதவியுடன் நடக்கவே விரும்பி இருந்தேன். ஆனால் உலங்கு வானூர்திப் பிரயாணம் காலநிலை சீராற்ற காலங்களில், மழைக்காலங்களில் நடைபெறுவதில்லை( முதல் நாள் மழை காரணமாக வானூர்திப் பிரயாணம் நடைபெறவில்லை என்றும் அறிந்தேன்) என்று அறிந்ததினாலும், அன்று நல்ல காலநிலை என்பதினாலும் அன்று பறக்க முன்பதிவு செய்யச் சென்றேன்.

அன்று பயணிப்பவர்கள் அதிகமென்பதினால் மாலை 3 மணிக்கு பறக்கும் உலங்குவானூர்தியில் தான் எனக்கு இடம் கிடைத்தது.அப்பொழுது நேரம் 11 மணி. ஆனால் உதவியாளர்களின் உதவியுடன் கிளேசியரில் நடக்கும் நேரமும், உலங்குவானூர்திப் பயணமும் ஒரே நேரத்துக்குள் வருவதினால் நடப்பதைக் கைவிட்டேன்.(கொகிரிகாவில் நான் தங்கியிருந்த உரிமையாளர் கால் வலிக்க நடக்கவேண்டும் என்று சொல்லியிருந்தாலும் நான் கிளேசியரில் நடக்க விரும்பி இருந்தேன்) ஆனால் வழிகாட்டி இல்லாது Glacier மலையின் அடி வரை நடந்து செல்ல கிட்டத்தட்ட 1 மணித்தியாலம் எடுக்கும் பயணத்தை உலங்குவானூர்திப் பயணம் முடிய நடந்து செல்ல விரும்பினேன். உலங்குவானுர்திப் பயணம் செல்ல இன்னும் 4 மணித்தியாலம் இருப்பதினால் மதிய உணவின் பின்பு அருகில் உள்ள பூங்காவிற்கு சென்று பார்வையிட்டேன்.

பூங்காவுக்கு சென்று பார்வையிட்டு வர கிட்டத்தட்ட அரை மணித்தியாலத்துக்கு மேல் நேரம் எடுத்தது.

Fox Glacierல் 2,3 உணவகங்களே இருக்கிறது. கடைகள் மிகக்குறைவு. மதிய உணவு உண்ட உணவகத்தின் படத்தினை நீங்கள் காண்கிறீர்கள்

மாலை 3 மணியளவில் உலங்குவானூர்தி வரும் இடத்துக்கு செல்ல, வானூர்தியும் எம்மை நோக்கி வந்து கொண்டிருந்தது.

நியூசிலாந்து 9 -பெரிய பனிக்கட்டி நாடு

2010-07-12T22:41:00.001-07:00

பல வருடங்களாக உறைந்த நிலையில் இருக்கும் பனிக்கட்டிகள், நீர்களினால் Glacier(பெரிய பனிக்கட்டி)உருவாகும்.இவ் Glacier பூவியீர்ப்புக்கு ஏற்றவிதத்தில் ஒடும்.Franz Josef , Fox Glacier அமைந்துள்ள இடத்தை West Coast glaciers என்று அழைக்கிறார்கள். 2600 மீட்டர் உயரத்திலிருந்து விழும் Fox Glacier 13 கிலோ மிட்டர் தூரத்துக்கு நீராக ஓடுகிறது. தற்பொழுது 85ம் ஆண்டுக்கு பிறகு ஓடும் நீளம் சிறிது சிறிதாகக் குறைகிறது.

கொகிரிகாவில் தங்கியிருந்த விடுதி உரிமையாளரிடம் உரையாடிய போது "வொக்ஸ் கிளேசியர், விரான்ஸ் ஜோசவ் ஆகிய இரண்டு இடங்களையும் ஒரு நாளில் பார்க்க நேரம் கிடைக்காது. இரண்டிலும் Fox Glacier வே சிறந்தது" என்றார். சுற்றுலா வழிகாட்டியின் உதவியுடன் Glacierல் சில பகுதிக்கு ஏறிச் சென்று பார்க்கலாம். பிரயாணம் ஆபத்தாக முடியும் என்பதினால் வழிகாட்டியின்றி கிளேசியரில் பயணிக்ககூடாது.விடுதி உரிமையாளார் இப்பிரயாணத்தில் நடக்க இரண்டு மணித்தியாலங்கள் எடுக்கும் என்றும், கால் வலிக்கும் என்றார். வழிகாட்டியின்றி கிளேசியர் இருக்கும் மலையின் அடிவாரத்துக்கு செல்ல ஒரு மணித்தியாலம் எடுக்கும். இதற்கு கட்டணமுமில்லை. அடிவாரம் வரை நடந்து செல்லுங்கள் என்றார். கிளேசியரில் ஏறுவதற்கு பதிலாக உலங்கு வானூர்தி அல்லது சிறிய விமானத்தில் பயணித்து வானிலிருந்து விரான்ஸ் ஜோசவ்,வொக்ஸ் கிளேசியர் ப்பார்க்கலாம். வேறு மலைகளையும் பார்க்கலாம். அத்துடன் ஒரு மலையின் உள்ள கிளேசியரின் ஒரு பகுதியில் பத்து,பதினைந்து நிமிடத்துக்கு இறக்கிவிடுவார்கள் என்றும் சொன்னார். Fox Glacierக்கு செல்ல Franz Josef இன் ஊடாகப் பிரயாணிக்க வேண்டும்.

காலை உணவை கொகிரிகாவில் உள்ள உணவகம் ஒன்றில் உண்டபின்பு, காலை 8 மணியளவில் விரான்ஸ் ஜோசவ் கிளேசியரை நோக்கிப் பயணித்தேன்.

கொகிரிகாவில் இருந்து கிட்டத்தட்ட 1மணித்தியாலமும் 45 நிமிடங்களும் சென்றால் Franz Josefவை அடையலாம்.

விரான்ஸ் ஜோசப் நகரத்தை 10 மணியளவில் அடைந்தேன். ஆனால் வொக்ஸ் கிளேசியரில் அதிக நேரம் செலவிடுவதினால் விரான்ஸ் ஜோசப்பில் உள்ள கிளேசியரைப் பார்க்காமல் சென்றேன்.

Franz Josef உள்ள நகர விதியில் பிரயாணிக்கும் போது எடுத்த புகைப்படத்தை கீழே காண்கிறீர்கள்.

Franz Josefவில் இருந்து மேலும் 15 நிமிடங்கள் பயணித்தால் Fox Glacierவை அடையலாம்.

நியூசிலாந்து 8 -கொகிரிகா(Hokitika)

2010-07-08T23:30:00.001-07:00

Shanty Townல் இருந்து வெளிக்கிட்டு அரை மணித்தியாலப் பயண முடிவில் மாலை ஆறு மணியளவில் அன்று இரவு தங்க உள்ள கொகிரிகா என்ற இடத்தை அடைந்தேன். விடுதியில் உடமைகளை வைத்து விட்டு கொகிரிகா நகரைப் பார்க்க விரும்பினேன்.விடுதியில் இரவு உணவை உண்ணுவதை விட வெளியிடங்களில் நல்ல சுவையான உணவை குறைந்த விலையில் உண்ணலாம்.

நகரத்தில் 3,4 வீதிகள் மட்டுமே காணப்பட்டன. பொதுவாக தென் நியூசிலாந்தில் கிறைஸ் சேர்ச், டனிடன் போன்ற சில நகரங்களைத் தவிர பெரும்பாலன இடங்களில் 3,4 வீதிகளே இருந்தன. கொகிரிகா நகரின் மத்தியில் பெரிய மணிக்கூட்டுக் கோபுரம் ஒன்று இருந்தது. சனத்தொகையும் குறைவு.கடைகளும் குறைவு. இரவில் பார்ப்பதற்கு பெரிதாக ஒன்றும் இருக்கவில்லை. உணவகத்தில் உண்டபின்பு கடற்கரையில் பொழுதினைப் போக்கலாம் என நினைத்தேன். தென் நியூசிலாந்தில் முக்கிய நகரங்களைத் தவிர இரவில் வீதிகளில் பிரயாணிக்கும் போது மின்சார ஒளியினைக் காணமுடியாது. கொகிரிகாவில் ஆங்கில உணவகங்களே பெரும்பாலும் காணப்பட்டன. ஒரிடத்தில் ஒரு இந்தியா உணவகமும் இருந்தது. அங்கு அன்றைய உணவை உண்டபின் அருகில் உள்ள கடற்கரையில் பொழுதைக் கழிக்கச் சென்றேன்.

2 ம் நாள் பயணம்
2ம் நாள் இரவு வொக்ஸ் கிளேசியரில் தங்குவதாக வொக்ஸ் கிளேசியரில் உள்ள விடுதி ஒன்றில் முன் பதிவு செய்திருந்தேன்.இந்த 2005ம் ஆண்டுப் பயணத்தில் நான் வோக்ஸ் கிளேசியரும்(Fox Glacier), மில்வேட் ஒலியையும்(milford sound) பார்ப்பதற்கு ஏற்ப விடுதிகளைப் முன் பதிவு செய்திருந்தேன். அதிக நேரங்கள் வோக்ஸ் கிளேசியரில் செலவிட விரும்பினேன். இதனால் கொகிரிகாவில் அதிக நேரம் நிற்கவிரும்பவில்லை. இரண்டு மணித்தியாலம் பயணம் சென்றால் தான் வோக்ஸ் கிளேசியர் வரும். காலை உணவை கொகிரிகாவில் உண்டபின்பு வோக்ஸ் கிளேசியரை நோக்கிப் பயணித்தேன்.

நியூசிலாந்து 7 -புராதன நகரம்(Shanty Town)

2010-07-06T17:39:00.001-07:00

புனாகைகியில் இருந்து வெளிக்கிடும் போது நேரம் கிட்டத்தட்ட மாலை 4 மணியாக இருந்தது.இன்னும் அரை மணித்தியாலம் வந்த பாதையின் வழியாக (தெற்கை நோக்கி) பிரயாணம் செய்தால் Greymouth வரும். அதில் இருந்து மேலும் அரை மணித்தியாலம் சென்றால், அன்று இரவு தங்கும் விடுதி உள்ள Hokitika வரும். நல்ல வெளிச்சமாக இருப்பதினால் Greymouthல் உள்ள Shanty Townல் நேரத்தை செலவிட விரும்பினேன்.
இவ்விடம் தெற்கு கிறேமவூத்தில் இருந்து 10 கிலோமீற்றர் தூரத்தில் அமைந்திருக்கிறது. நத்தார் விடுமுறை தவிர மற்றைய எல்லா நாட்களும் இவ்விடத்துக்கு காலை 8.30 மணியில் இருந்து மாலை 5 மணிக்குள் சென்று வரலாம். இங்கு செல்ல கட்டணம் அறவிடுவார்கள்.19ம் நூற்றாண்டில் தெற்கு நியூசிலாந்தில் மேற்குக்கடற்கரையில் குடியேறியவர்களின் வாழ்க்கையை இங்கு காணலாம். அக்காலங்களில் தங்கங்களைப் பெற பலர் மேற்குக்கடற்கரையில் குடியேறியுள்ளார்கள். அவர்களில் சீனர்களும் அதிகளவில் இருந்தார்கள்.

30க்கு மேற்பட்ட கட்டிடங்களைக் கொண்ட இவ்விடத்தில் தேவாலயம், இரத்தினக்கற்கள் கனிப்பொருட்கள் உள்ள மண்டபம்,அச்சிடும் நிலையம், விடுதி, தீயணைப்பு நிலையம், புகையிரத நிலையம், தபால் அலுவலகம், கசாப்புக்கடை, சிறைச்சாலை, சீனா நகர் போன்றவற்றைக் காணலாம். இவை அந்தக்காலத்து வாழ்க்கையை சுற்றுலாப் பயணிக்களுக்குச் சொல்லும்.

இயற்கையை இரசித்துக் கொண்டு நடக்க நடைபாதைகளும் இருக்கின்றன.

19ம் நூற்றாண்டில் இருந்த தளபாடங்கள், உடைகள், புகைப்படங்கள் போன்ற பலவற்றை சேகரித்து வைத்திருக்கிறார்கள்.

நிலக்கரியில் ஒடும் புகையிரதப்பயணமும் இருக்கிறது. ஆனால் இதற்கு தனியாகக் கட்டணம் செலுத்த வேண்டும்.

கிட்டத்தட்ட 10 நிமிடப் புகையிரதப்பயணத்தின் முடிவில் தங்கத்தினை வடித்தெடுக்கும் இடத்தினை அடைந்தோம். அங்கே ஒவ்வொருவருக்கும் சிறு பாத்திரத்தில் மண்களைத் தந்தார்கள். நாங்கள் தண்ணீரில் வடித்துக் கழுவும் போது சிறு சிறு தங்கங்களை பாத்திரத்தில் கண்டோம். அவற்றை சிறிய போத்தலில் அடைத்து எங்களுக்கு தந்தார்கள்.